Псаломтӕ 9 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн: «Алмут Лаббен»-ы зӕлтӕм гӕсгӕ. Давиды псалом.

² О Дунедарӕг, зӕрдӕбынӕй Дӕ стаудзынӕн, Дӕ диссӕгты тыххӕй Дын дзурдзынӕн.

³ Цин кӕндзынӕн, сараздзынӕн бӕрӕгбон, Иууылбӕрзонд, стаудзынӕн Дын Дӕ ном.

⁴ Ме знӕгтӕ лидзӕг фесты, ӕрхаудысты, бабын сты Дӕ разы.

⁵ Уымӕн ӕмӕ мын Ды мӕ хъаст равзӕрстай. Дӕ къӕлӕтджыны ӕрбадгӕйӕ, Ды раст тӕрхон рахастай, о раст Тӕрхонгӕнӕг!

⁶ Дӕ азар баййӕфта адӕмты, фыдгӕнджыты ныццагътай, мыггагмӕ сын сӕ кой дӕр фесӕфтай.

⁷ Знӕгтӕ бынысӕфт фесты, ныппырх сын кодтай сӕ сахартӕ, ӕмӕ сӕ кой дӕр нал ис.

⁸ Фӕлӕ Дунедарӕг Йӕ къӕлӕтджыны — ӕнустӕм, Йӕ паддзахы бадӕн тӕрхон кӕнынмӕ цӕттӕ у.

⁹ Уый дунейӕн тӕрхон кӕндзӕни ӕнӕхӕрамӕй, адӕмтӕн рахӕсдзӕни раст тӕрхон.

¹⁰ Ӕфхӕрд лӕгӕн Дунедарӕг уыдзӕни ӕмбӕхсӕн, фыдбылызы заман ӕй бахиздзӕн.

¹¹ Дӕ ном Дын чи зоны, уыдонӕн сӕ ныфс Ды Дӕ, Дунедарӕг, уымӕн ӕмӕ Ды нӕ ныууадздзынӕ, Дӕу чи агуры, уыдоны.

¹² Кады зарӕг кӕнут Дунедарӕгӕн, Сионы Паддзахӕн, адӕмтӕн хъусын кӕнут Йӕ хъуыддӕгтӕ.

¹³ Уымӕн ӕмӕ Уый туджы аргъ фидын кӕны, рох Дзы нӕу мӕгуырты дзыназын.

¹⁴ Батӕригъӕд мын кӕн, Дунедарӕг, ӕркӕс, ме знӕгтӕ мӕ удхарӕй куыд марынц, уымӕ, мӕлӕты комӕй мӕ байс!

¹⁵ Ӕмӕ ӕз ӕппӕлдзынӕн Дӕуӕй Сионы чызджы кулдуары раз, цин кӕндзынӕн, кӕй мӕ фервӕзын кодтай, ууыл.

¹⁶ Адӕмтӕ, сӕхӕдӕг кӕй скъахтой, уыцы дзыхъхъы аирвӕзтысты, сусӕг ран цы ахсӕн хыз сӕвӕрдтой, уый сӕхи къӕхтыл стыхсти.

¹⁷ Дунедарӕг раргом ис, стӕрхон кодта: фыдгӕнджытӕ сӕхи къӕппӕджы бахаудтой.

¹⁸ Мӕрдтыбӕсты хай бауӕнт фыдгӕнджытӕ, Хуыцау кӕмӕй ферох, ӕппӕт уыцы адӕмтӕ.

¹⁹ Ӕнусмӕ нӕ уыдзӕн рохуаты мӕгуыр лӕг, мӕгуыр лӕджы ныфс мыггагмӕ сӕфт нӕу.

²⁰ Раст, Дунедарӕг, уадз адӕймаг йӕхи бӕрзонд ма сӕвӕра, адӕмты ӕрлӕууын кӕн Дӕ тӕрхоны раз.

²¹ Ӕвирхъау тас сыл бафтау, Дунедарӕг; уадз, зоной — адӕмӕй уӕлдай ницы сты.

²² О Дунедарӕг! Цӕмӕн лӕууыс дард, фыд заманы цӕмӕн бамбӕхстай Дӕхи?

²³ Сӕрбӕрзондӕй ӕнӕхуыцау мӕгуыр лӕджы фӕдыл зилы — йӕ фыдвӕндты азар йӕхи баййафӕд!

²⁴ Фыдгӕнӕг ӕппӕлы йӕ монцтӕй, кӕрӕф адӕймаг буц кӕны йӕхи, Дунедарӕджы та фауы.

²⁵ Ӕнӕхуыцау сӕрбӕрзондӕй кӕсы, Дунедарӕджы ницӕмӕ дары, дзуапп дӕттын мӕ нӕ бахъӕудзӕни, Хуыцау нӕй, зӕгъгӕ.

²⁶ Йӕ хъуыддӕгты — алкӕддӕр ӕнтыстджын, дард у Дӕ уынаффӕтӕй, ӕлгъ кӕны йе ’ппӕт знӕгтыл.

²⁷ Йӕхинымӕр зӕгъы: «Нӕ фӕцуддзынӕн, мыггагмӕ фыдбылызӕй хызт уыдзынӕн».

²⁸ Йӕ былалгъыл — ӕрмӕстдӕр ӕлгъыст, мӕнгарддзинад ӕмӕ сайд, йе ’взагыл — бӕллӕх ӕмӕ фыдбылыз.

²⁹ Бабады фӕскъуымты, фӕсвӕдӕй амары ӕнаххосы, аивӕй йӕ амӕттаджы хъахъхъӕны.

³⁰ Домбай йӕ хуыккомы куыд бабада, уыйау рӕсӕны фӕбады, цӕмӕй мӕгуыр лӕджы ӕрцахса; фӕлӕбуры мӕгуыр лӕгмӕ, йӕ ахсӕн хыз ыл баппары.

³¹ Ӕрныгъуылы, ӕрӕмбӕхсы, ӕмӕ ӕнӕбонтӕ бахауынц йӕ дзӕмбытӕм.

³² Фӕзӕгъы йӕхицӕн: «Ферох дӕн Хуыцауӕй! Йӕ цӕсгом азылдта, никуы мӕ фендзӕн».

³³ Раст, Дунедарӕг! Сис Дӕ къух, Хуыцау! Ӕфхӕрд адӕмы ма ферох кӕн.

³⁴ Фыдгӕнӕг цӕмӕн фауы Хуыцауы? Афтӕ йӕм цӕмӕн кӕсы, цыма дзы дзуапп не ’рдомдзынӕ?

³⁵ Ды кӕсыс, маст ӕмӕ рыст уыныс — Дӕхи къухӕй сын райсдзынӕ сӕ маст! Дӕуыл фӕдзӕхсы йӕхи мӕгуыр лӕг, йе ’ххуысгӕнӕг сидзӕрӕн Ды дӕ!

³⁶ Фыдгӕнӕг ӕмӕ ӕнӕхуыцауӕн йӕ тых басӕтт, йӕ кой дӕр куыннӕуал баззайа, афтӕ.

³⁷ Дунедарӕг — мыггагмӕйы паддзах; муртаттӕгтӕ ӕрбайсӕфдзысты Йӕ зӕххӕй.

³⁸ Сӕрныллӕгты бӕллицтӕ зоныс, Дунедарӕг! Сӕ зӕрдӕтӕ сын фӕфидар кӕн, фехъус сӕ,

³⁹ цӕмӕй сидзӕр ӕмӕ ӕфхӕрдӕн раст тӕрхон уа, цӕмӕй ӕфхӕрджытӕ мауал уой зӕххыл.