Псаломтӕ 89 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Хуыцауы ӕвзӕрст лӕг Моисейы куывд.

² О Хуыцау, фӕлтӕрӕй фӕлтӕрмӕ Ды дӕ не ’мбӕхсӕн бынат!

³ Хӕхтӕ нӕма сӕнтыстысты, дуне ӕмӕ зӕхх нӕма сфӕлдыстай — ӕнусӕй ӕнустӕм Ды Хуыцау дӕ.

⁴ Ды адӕймаджы фӕстӕмӕ сыджытмӕ раздахыс, фӕзӕгъыс адӕмӕн: «Раздӕхут сыджытмӕ!»

⁵ Дӕуӕн мин азы сты зноны бонау, ӕхсӕвы хъахъхъӕнӕджы иу аивдау.

⁶ Ды тыгъдызӕйау адӕмы ахӕссыс Дӕ разӕй, ӕмӕ ӕрбайсӕфынц фынау; кӕрдӕджы ’нгӕс сты уыдон — райсомӕй чи ӕрзайы, дидинӕг чи ракалы, изӕры та чи ахус вӕййы.

⁷ Уымӕн ӕмӕ мах Дӕ азарӕй фесӕфӕм, Дӕ маст ныл ӕвирхъау тас ӕфтауы.

⁸ Нӕ тӕригъӕдтӕ нын равӕрдтай Дӕ разы, нӕ сусӕгтӕ Дӕ цӕсгомы рухсӕй раргом кодтай.

⁹ Цӕргӕбонты нӕм Дӕ маст нӕ сысы, ӕмӕ нӕ азтӕ иунӕг уысмау атӕхынц.

¹⁰ Нымадӕй ахӕссӕм ӕвдай азы, хъӕддыхдӕр чи у, уый — ӕстай, сӕ фылдӕр хай — фыдӕбон ӕмӕ низтӕ; уайтагъд фӕвӕййынц, ӕмӕ ӕрбайсӕфӕм.

¹¹ Дӕ масты тых Дын чи базыдта? Хуыцауы тас нӕм цас фылдӕр ис, уый бӕрц нӕм къаддӕр абухы Дӕ маст.

¹² Сахуыр нӕ кӕн нӕ царды бонтӕ афтӕ нымайын, цӕмӕй нӕ зӕрдӕ суа куырыхон.

¹³ О Дунедарӕг, раздӕх нӕм! Кӕдмӕ нӕм мӕсты кӕндзынӕ? Батӕригъӕд кӕн Дӕ цагъартӕн!

¹⁴ Ӕрвылрайсом нӕ Дӕ хорзӕхӕй ӕфсад, цӕмӕй зӕрдӕрухс уӕм, нӕ царды бонтӕ цинимӕ ӕрвитӕм.

¹⁵ Цал боны ӕмӕ нӕ цал азы ӕфхӕрдтай, уыдоны ныхмӕ нын циндзинад ратт,

¹⁶ Дӕ цагъартӕ Дын Де стырад куыд феной, сӕ кӕстӕртӕм куыд раргом уа Дӕ кад!

¹⁷ Нӕ Дунедарӕг Хуыцауы хорзӕх нӕ уӕд! Нӕ къухтӕ нын фӕфидар кӕн нӕ алы хъуыддаджы, хъару ратт нӕ цӕнгты фӕллойӕн!