Псаломтӕ 88 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарахы байзӕддаг Етаны зондамонӕн псалом.

² О Дунедарӕг, мыггагмӕ зардзынӕн Де стыр хорзӕхтыл, фӕлтӕрӕй фӕлтӕрмӕ хъусын кӕндзынӕн Дӕ рӕстад.

³ Дзурын ӕз: ӕнусон у Дӕ хорзӕх, Дӕ иузӕрдиондзиад айтыгътай уӕлӕрвты. [Хуыцау:]

⁴ — Ӕз ме ’взӕрстимӕ фидыд сарӕзтон, Мӕ цагъарӕн, Давидӕн, сомы ракодтон:

⁵ «Дӕ байзӕддагыл дын мыггагмӕ Мӕ арм дардзынӕн, Дӕ паддзахы бадӕн дын фӕлтӕрӕй фӕлтӕрмӕ сфидар кӕндзынӕн».

⁶ Дунедарӕг! Уӕлӕрвтӕ стауынц Дӕ диссӕгтӕ, Дӕ иузӕрдиондзинад стауынц сыгъдӕджытӕ.

⁷ Дунедарӕгимӕ кӕй абарӕн ис уӕлӕрвты? Хуыцауы фыртты ’хсӕн Дунедарӕджы хуызӕн чи у?

⁸ Тасӕфтауӕг у Хуыцау Йӕ сыгъдӕджыты астӕу, Йӕ алыварс чи ис, ӕппӕт уыдонӕй тӕссагдӕр.

⁹ О Дунедарӕг, Уӕларвӕфсады Бардарӕг, Дӕуӕн ӕмбал кӕм ис? О Дунедарӕг, чи у тыхджын Дӕуау? Дӕ алыварс — Дӕ иузӕрдиондзинад.

¹⁰ Ды абухгӕ денджызыл паддзахиуӕг кӕныс, йӕ уылӕнтӕ хӕрдмӕ куы ссӕуынц, уӕд сӕ ӕрсабыр кӕныс Ды.

¹¹ Мӕлӕтдзаг цӕф ныккодтай Рахавӕн, Дӕ хъомысджын къухӕй Де знӕгты фӕсырдтай.

¹² Дӕу у арв, Дӕу у зӕхх дӕр; Ды сфӕлдыстай дун-дуне ӕмӕ дзы цыдӕриддӕр ис, уыдон.

¹³ Цӕгат ӕмӕ хуссар дӕр Ды сфӕлдыстай, Дӕ ном Дын сыстауынц Фавор ӕмӕ Ермон.

¹⁴ Хъӕддых у Дӕ цонг, хъомысджын у Дӕ къух, Дӕ рахиз къух бӕрзонд систай.

¹⁵ Дӕ паддзахы бадӕны бындур — рӕстдзинад ӕмӕ раст тӕрхон; Дӕ хорзӕх ӕмӕ Дӕ иузӕрдиондзинад цӕуынц Дӕ разӕй.

¹⁶ Тӕхудиаг — уӕлахизгӕнӕг адӕм! Дунедарӕг, сӕ алыварс — Дӕ рухс.

¹⁷ Дӕ номыл цин кӕнынц ӕрвылбон, Дӕ рӕстадӕй сты сӕрыстыр.

¹⁸ Сӕ тых ӕмӕ сӕ кад Ды дӕ, Дӕ хорзӕхы фӕрцы уӕлахиз кӕнӕм.

¹⁹ Дунедарӕг — нӕ уарт, Израилы Уаз Хуыцау — нӕ паддзах.

²⁰ Дӕ сыгъдӕджытӕм цӕстылуайӕны раргом дӕ ӕмӕ загътай: «Ӕз баххуыс кодтон сахъгуырдӕн, Мӕ адӕмы ’хсӕн кӕй сӕвзӕрстон, уымӕн.

²¹ Ӕз ссардтон Мӕ цагъары, Давиды, байсӕрстон ӕй Мӕ сыгъдӕг оливӕйы сойӕ.

²² Мӕ цонг ӕй фидар кӕндзӕни, Мӕ арм ыл дардзынӕн.

²³ Нӕ йыл фӕтых уыдзӕни знаг, ӕнӕхуыцау ӕй нӕ бахъыгдардзӕн.

²⁴ Ныппырх кӕндзынӕн йе знӕгты йӕ разы, ӕнӕуынон кӕмӕн у — ныззыгуым сӕ кӕндзынӕн.

²⁵ Мӕ хорзӕх ӕмӕ мӕ иузӕрдиондзинад йемӕ сты. Йӕ сыкъауадындзтӕ Мӕ номимӕ уӕлахиздзауӕй сисдзӕни бӕрзонд.

²⁶ Йӕ дӕлбар ын Ӕз бакӕндзынӕн денджыз, цӕугӕдӕттӕ йын ратдзынӕн йӕ къухмӕ.

²⁷ Уый хондзӕни Мӕн: „Мӕ Фыд, мӕ Хуыцау, мӕ Ирвӕзынгӕнӕг!“

²⁸ Ӕз ӕй Мӕ фыццаг зӕнӕг скӕндзынӕн, зӕххон паддзӕхтӕн се ’ппӕтӕй уӕлдӕр.

²⁹ Мыггагмӕ йын Мӕ хорзӕх ратдзынӕн, Мӕ фидыд Ӕз нӕ фехалдзынӕн йемӕ.

³⁰ Йӕ байзӕддаг цӕрдзӕн ӕнусмӕ, йӕ паддзахы бадӕн арвау у ӕнусон.

³¹ Йӕ фырттӕ Мын куы ферох кӕной Ме ’гъдау, Мӕ фӕдзӕхстытӕ куы не ’ххӕст кӕной,

³² Мӕ фӕткӕвӕрд Мын куы фехалой,

³³ уӕд Мӕ лӕдзӕджы цӕф базондзысты ӕмӕ сӕ баййафдзӕн Мӕ азар сӕ тӕригъӕдты аххосӕй.

³⁴ Фӕлӕ Мӕ хорзӕхӕй нӕ уыдзысты ӕнӕхай, Ӕз сыл ӕдзухдӕр иузӕрдион уыдзынӕн.

³⁵ Мӕ фидыд Ӕз нӕ фехалдзынӕн семӕ, Мӕ зӕрдӕвӕрд нӕ аивдзынӕн никуы.

³⁶ Ӕз иу хатт сомы ракодтон Мӕ сыгъдӕгдзинадӕй, нӕ асайдзынӕн Ӕз Давиды.

³⁷ Йӕ байзӕддаг нӕ сыскъуыйдзӕн мыггагмӕ, йӕ паддзахы бадӕн — хурӕнгӕс Мӕ разы;

³⁸ уыдзӕн ӕнусмӕ мӕйы хуызӕн фидар, уӕларвыл ис нӕ сомыйы ӕвдисӕн».

³⁹ Фӕлӕ ныл Ды хъоды бакодтай ныр, ӕнӕуынон Дын систӕм, Дӕ байсӕрстмӕ Дӕ маст ссыгъди.

⁴⁰ Дӕ цагъаримӕ фехӕлдтай Дӕ фидыд, йӕ кады худ ын фехстай зӕхмӕ.

⁴¹ Ды йын ныппырх кодтай йӕ бырутӕ, йӕ фидӕрттӕй йын сарӕзтай хӕлддзӕгтӕ,

⁴² фӕндаггонтӕн сси хӕлӕттаг, йӕ сыхӕгтӕн — хынджылӕггаг.

⁴³ Ды радтай йе знӕгтӕн уӕлахиз, йӕ фыдызнӕгтӕн циндзинад ӕрхастай,

⁴⁴ йӕ хъама йын ныкъкъуымых кодтай хӕсты, Ды тохы бон нӕ хӕцыдтӕ йӕ фарс.

⁴⁵ Йӕ паддзахы лӕдзӕг ын байстай, йӕ паддзахы бадӕн ын сфӕлдӕхтай.

⁴⁶ Йе ’взонджы бонтӕ йын фӕцыбыр кодтай, ӕгады ном ыл сӕвӕрдтай.

⁴⁷ О Дунедарӕг! Кӕдмӕ ӕмбӕхсдзынӕ Дӕхи? Кӕдмӕ калдзӕни пиллон арт Дӕ маст?

⁴⁸ Мӕ цард куыд цыбыр у, уый ӕрымыс. Ау, адӕмы бынтон дзӕгъӕлы сфӕлдыстай?

⁴⁹ Адӕмӕй чи царди ӕмӕ мӕлӕт чи нӕ федта, мӕрдтыбӕстӕй чи аирвӕзт?

⁵⁰ О Дунедарӕг! Дӕ раздӕры хорзӕхтӕ кӕм сты? Ды сомы куы ракодтай Давидӕн, кӕй йыл уыдзынӕ иузӕрдион.

⁵¹ О Дунедарӕг, ӕрымыс, фидиссаг куыд систӕм знӕгтӕн, ӕцӕгӕлон адӕмтӕн — хынджылӕггаг,

⁵² Де знӕгтӕ нын фидистӕ куыд кӕнынц, Дунедарӕг, Дӕ байсӕрсты йӕ алы къахдзӕфыл куыд ӕгад кӕнынц.

⁵³ Дунедарӕг арфӕгонд у ӕнусӕй ӕнустӕм. Аммен. Аммен.