Псаломтӕ 86 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Корахы фыртты псалом. Зарӕг. Дунедарӕг Йӕ сахарӕн уаз хохыл ӕрӕвӕрдта бындур.

² Йаковы байзӕддаджы цӕрӕнтӕй Дунедарӕг уӕлдай тынгдӕр уарзы Сионы кулдуар.

³ Хуыцауы сахар, дӕ кады кой айхъуысти дӕрдтыл!

⁴ Чи Мӕ зоны, уыдонӕн Ӕз Рахав ӕмӕ Вавилоны кой ракӕндзынӕн; филистимӕгтӕ, стӕй Тир ӕмӕ Эфиопийы цӕрджытӕ зӕгъдзысты: «Ахӕм ӕмӕ ахӕм адӕймаг райгуырди уым».

⁵ Сионы тыххӕй дӕр дзурдзысты: «Ахӕм ӕмӕ ахӕм адӕймаг райгуырди уым, ӕмӕ уыцы сахарӕн фидар бындур Бӕрзӕндтыл Бадӕг Йӕхӕдӕг ӕрӕвӕрдта».

⁶ Дунедарӕг адӕмты сфысты ныффысдзӕн: «Ахӕм ӕмӕ ахӕм адӕймаг райгуырди уым.»

⁷ Кафджытӕ ӕмӕ зарӕггӕнджытӕ зӕгъдзысты: «Нӕ фарны суадӕттӕ иууылдӕр Дӕуӕй цӕуынц!»