Псаломтӕ 85 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды куывд. О Дунедарӕг, фехъус мӕ ӕмӕ мын дзуапп ратт, уымӕн ӕмӕ мӕгуыр ӕмӕ гӕвзыкк дӕн!

² Фыдбылызӕй мӕ бахиз, уымӕн ӕмӕ Дыл ӕз иузӕрдион дӕн! Фервӕзын кӕн Дӕ лӕггадгӕнӕджы, уымӕн ӕмӕ Ды мӕ Хуыцау дӕ, мӕхи Дӕуыл фӕдзӕхсын!

³ О Дунедарӕг, батӕригъӕд мын кӕн, бон-сауизӕрмӕ Дӕм дзыназын!

⁴ О Дунедарӕг, Ды мӕ ныфс Дӕ, Дӕ лӕггадгӕнӕджы зӕрдӕ барухс кӕн!

⁵ О Дунедарӕг, Ды хӕрзгӕнӕг ӕмӕ хатыргӕнаг дӕ, ӕнӕкӕрон у Дӕ хорзӕх, чи Дӕм кувы, уыдонӕн.

⁶ Дунедарӕг, фехъус мын мӕ куывд, Дӕ хъус ӕрдар мӕ лӕгъстӕтӕм!

⁷ Мӕ тыхст бон Дӕм дзыназын, ӕмӕ мын Ды ратдзынӕ дзуапп.

⁸ О Дунедарӕг, хуыцӕутты ’хсӕн Дӕуӕн ӕмбал кӕм ис? Уымӕн ӕмӕ, Ды цы хъуыддӕгтӕ аразыс, уыдон никӕмӕн бантысдзысты!

⁹ Де сфӕлдыст адӕмтӕ Дӕм иууылдӕр ӕрбацӕудзысты, Дунедарӕг, ӕрзоныг кӕндзысты Дӕ разы, сыстаудзысты Дӕ ном.

¹⁰ Уымӕн ӕмӕ Ды дӕ Стыр Иунӕг Хуыцау — диссӕгтӕ фӕлдисӕг!

¹¹ О Дунедарӕг, сахуыр мӕ кӕн Дӕ фӕндагыл цӕуын, цӕмӕй Дын иузӕрдионӕй лӕггад кӕнон! Мӕ зӕрдӕйы мын Дӕ разы аргъуыцгӕнгӕ цӕрыны хъару бауадз!

¹² Зӕрдӕбынӕй Дӕ стаудзынӕн ӕмӕ мыггагмӕ кад кӕндзынӕн Дӕ номӕн, о Дунедарӕг, мӕ Хуыцау!

¹³ Уымӕн ӕмӕ мын Ды Де стыр хорзӕх саккаг кодтай, бахызтай мӕ ӕнӕбын зындонӕй.

¹⁴ О Хуыцау! Сӕрыстыр адӕм сыстадысты мӕ ныхмӕ, фыдлӕгты бардз мӕ марынвӕнд скодта — уыдон нӕ нымайынц Дӕу!

¹⁵ Фӕлӕ Ды, Дунедарӕг, хӕларзӕрдӕ ӕмӕ тӕригъӕдгӕнаг дӕ, бирӕбыхсаг, бирӕбараг ӕмӕ иузӕрдион.

¹⁶ Ӕркӕс мӕм, батӕригъӕд мын кӕн, хъару ратт Дӕ лӕггадгӕнӕгӕн, фервӕзын кӕн Дӕ унӕуты фырты!

¹⁷ Кӕй мыл аудыс, уый нысан мын равдис; уадз ӕмӕ, ӕнӕуынон кӕмӕн дӕн, уыдон феной, Ды мын, Дунедарӕг, кӕй баххуыс кодтай, ныфс мӕ кӕй бауагътай, уый ӕмӕ къӕмдзӕстыгӕй баззайой!