Псаломтӕ 84 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Корахы фыртты псалом.

² О Дунедарӕг! Дӕ бӕстӕйӕн саккаг кодтай Дӕ хорзӕх, уацарӕй раздӕхтай Йаковы байзӕддаджы.

³ Дӕ адӕмӕн сӕ азым ныббарстай, сӕ тӕригъӕдтӕ сын ныххатыр кодтай.

⁴ Нал мӕсты кодтай, Дӕ маст ӕрсабыр ис.

⁵ Нӕ ирвӕзынгӕнӕг Хуыцау, сног нын кӕн нӕ тых, мауал ныл кал Дӕ маст!

⁶ Ау, ӕнусмӕ нӕм мӕсты кӕндзынӕ? Иу фӕлтӕрӕй иннӕмӕ судздзӕни Дӕ маст?

⁷ Ау, нал нӕ раздахдзынӕ цардмӕ, цӕмӕй Дӕ адӕм цин кӕной, Ды семӕ кӕй дӕ, ууыл?

⁸ О Дунедарӕг, Дӕ хорзӕх нын ратт, Дӕ ирвӕзындзинад нын балӕвар кӕн!

⁹ Байхъусон, Дунедарӕг Хуыцау цы зӕгъдзӕни, уымӕ. Уый Йӕ иузӕрдион адӕмӕн сабыр цардӕй зӕрдӕ ӕвӕры. Ӕрмӕст ныууадзӕнт се ’нӕсӕрфат митӕ.

¹⁰ Чи Дзы тӕрсы, уыдоны рӕхджы фервӕзын кӕндзӕн, ӕмӕ нӕ бӕстӕйы Хуыцауы кад ӕрцӕрдзӕн.

¹¹ Хорзӕх ӕмӕ иузӕрдиондзинад баиу уыдзысты, рӕстдзинад ӕмӕ фарн кӕрӕдзийӕн батӕ кӕндзысты.

¹² Иузӕрдиондзинад тау суадздзӕни зӕххӕй, ӕмӕ рӕстад ӕркӕсдзӕни уӕларвӕй.

¹³ Хуыцау зӕххыл ӕруадздзӕни Йӕ фарн, ӕмӕ нын нӕ зӕхх ратдзӕни йӕ тыллӕг.

¹⁴ Дунедарӕгӕн Йӕ разӕй цӕудзӕни Йӕ рӕстад ӕмӕ Йын ӕрцӕттӕ кӕндзӕни фӕндаг.