Псаломтӕ 83 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. «Ха-гиттит»-ы зӕлтӕм гӕсгӕ. Корахы фыртты псалом.

² Уӕларвӕфсады Бардарӕг! Куыд бӕллиццаг у Дӕ цӕрӕн бынат!

³ Тӕхуды, Дунедарӕджы Кувӕндоны кӕрты ма иу хатт мӕ къах куы ӕрӕвӕрин! Мӕ зӕрдӕ ӕмӕ мӕ буар цинимӕ куы скъӕфынц мӕн цардӕгас Хуыцаумӕ!

⁴ Дӕ нывондхӕссӕнты алыварс суанг сырддонцъиутӕ ӕмӕ зӕрватыччытӕ дӕр сӕ лӕппынтӕн ахстӕттӕ куы аразынц, Уӕларвӕфсады Бардарӕг, мӕ Паддзах ӕмӕ мӕ Хуыцау!

⁵ Тӕхудиаг сты, Дӕ хӕдзары чи цӕры, уыдон, — иудадзыг Дӕ стаудзысты!

⁶ Тӕхудиаг у, Ды йӕ хъомысы гуырӕн кӕмӕн дӕ ӕмӕ Дӕ раст фӕндагыл цӕуын ӕхцон кӕмӕн у!

⁷ Цӕссыджы дӕлвӕзы цӕугӕйӕ дӕр уыдон суадӕттӕ ссарынц, арфӕ йын ӕрхӕссы къӕвда.

⁸ Фӕндагыл фылдӕрӕй-фылдӕр кӕны сӕ хъару, Сионы хохыл Хуыцауы раз ӕрлӕууынц.

⁹ Дунедарӕг, Уӕларвӕфсады Бардарӕг, айс мын мӕ куывд! Йаковы Хуыцау, фехъус мын мӕ лӕгъстӕ!

¹⁰ О Хуыцау, нӕ сӕрылхӕцӕг! Дӕ аудӕг цӕстӕй ӕркӕс Дӕ байсӕрст паддзахмӕ!

¹¹ Дӕ Кувӕндоны кӕрты иу бон алӕууын ӕндӕр ран мин боны арвитынӕй — хуыздӕр! Ӕнӕхуыцӕутты цатырты цӕрынӕй Хуыцауы хӕдзарӕн йӕ къӕсӕры цур лӕууын — хуыздӕр!

¹² Дунедарӕг Хуыцау — нӕ хур ӕмӕ нӕ уарт. Дунедарӕг дӕтты фарн ӕмӕ кад. Йӕ царды бонтӕ рӕстӕй чи ӕрвиты, уыдоны ӕнӕ хӕрзиуӕгӕй нӕ ныууадздзӕн.

¹³ Уӕларвӕфсады Бардарӕг! Тӕхудиаг у, Дӕуыл йӕхи чи фӕдзӕхсы, уыцы адӕймаг.