Псаломтӕ 81 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Асафы псалом. Хуыцау сыстади хуыцӕутты ӕмбырды ӕмӕ се ’хсӕн рахаста Йӕ тӕрхон:

² «Ӕнӕраст тӕрхон кӕдмӕ хӕсдзыстут, фыдлӕгты фарс кӕдмӕ хӕцдзыстут?

³ Мӕгуырты ӕмӕ сидзӕрты сӕрыл хӕцут, ӕфхӕрд ӕмӕ мӕгуыр адӕмӕн рӕстаг тӕрхон хӕссут!

⁴ Бахизут ӕфхӕрд ӕмӕ мӕгуыры, фыдлӕгты къухтӕй сӕ фервӕзын кӕнут!

⁵ Ницы зонынц ӕмӕ ницы ’мбарынц, талынджы цӕуынц; суанг ма зӕххы бындуртӕ дӕр нынкъуыстысты!

⁶ Ӕз загътон: „Сымах хуыцӕуттӕ стут, уе ’ппӕт дӕр — Иууылбӕрзонды фырттӕ“,

⁷ фӕлӕ сымах дӕр иннӕ адӕмау амӕлдзыстут, зӕххон хицӕуттау бабын уыдзыстут».

⁸ О Хуыцау, сыст ӕмӕ тӕрхон кӕн зӕххӕн, уымӕн ӕмӕ ӕппӕт адӕмтӕ сты Дӕ исбон!