Псаломтӕ 79 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. «Хъоппӕг»-ы зӕлтӕм гӕсгӕ. Асафы псалом.

² Фехъус нӕ, Хуыцау, Израилы Фыййау, фосы дзугау Йосефы байзӕддаджы Йӕ фӕдыл Чи кӕны, Уый! О Херувимтыл Ӕнцайӕг, раргом нӕм кӕн Дӕхи!

³ Ефремы, Бениамины ӕмӕ Менассиайы байзӕддагӕн Де стыр хъомыс раргом кӕн, ӕрцу ӕмӕ нӕ фервӕзын кӕн!

⁴ О Хуыцау, сног нын кӕн нӕ тых, Дӕ рухс цӕсгом нӕм равдис, ӕмӕ фервӕздзыстӕм.

⁵ О Дунедарӕг, Уӕларвӕфсады Бардарӕг! Дӕ адӕмы куывдтытӕм кӕдмӕ мӕсты кӕндзынӕ?

⁶ Дзулау нӕ куы бафсӕстай цӕссыгӕй, цӕссыгты кӕхц нын бануазын кодтай дзагӕй.

⁷ Нӕ сыхӕгтӕн нӕ хъазинаг скодтай, хынджылӕг нӕ кӕнынц.

⁸ Уӕларвӕфсады Бардарӕг, сног нын кӕн нӕ тых! Дӕ рухс цӕсгом нӕм равдис, ӕмӕ фервӕзӕм!

⁹ Мысыры зӕххӕй ӕрбахастай сӕнӕфсиры тала, фӕсырдтай адӕмты, сӕ бынаты сын уыцы тала ныссагътай.

¹⁰ Йӕ алыварс мӕрмӕ йын базылдтӕ, ӕмӕ уый ауагъта йӕ уидӕгтӕ, йӕ талатӕ ӕгас бӕстӕйы суагъта.

¹¹ Йӕ аууонӕй ӕрӕмбӕрзта хӕхтӕ, егъау кедрты къалиутау райрӕзтысты Йӕ къабузтӕ.

¹² Денджызы онг айтыгъта йӕ къабӕзтӕ, Евфраты доны онг — йӕ талатӕ.

¹³ Уӕд ын цӕмӕн ныппырх кодтай йӕ бырутӕ, йӕ цупӕлттӕ йын цӕмӕн тонынц фӕндаггӕттӕ?

¹⁴ Хъӕддаг хуытӕ йӕ хӕрынц, быдираг сырдтӕ йын йӕ уидӕгтӕ ӕхсынынц.

¹⁵ Уӕларвӕфсады Бардарӕг! Де ’ргом нӕм раздах, ӕркӕс уӕларвӕй ацы таламӕ,

¹⁶ бахъахъхъӕн Дӕхи къухӕй сагъд сӕндон, Де схаст фырты!

¹⁷ Сӕндон басыгъди, ныццагътой йӕ, Дӕ азарӕй Дӕ адӕм сӕфынц.

¹⁸ Дӕ рахизфарс чи лӕууы ӕмӕ Де стыр хъомысӕй кӕмӕн бахай кодтай, уыцы адӕймагыл Дӕ арм ӕрӕвӕр, ахъаз ын бакӕн!

¹⁹ Мах Дыл никуы сивдзыстӕм нӕ зӕрдӕ; цардмӕ нӕ раздах, ӕмӕ Дын ссардзыстӕм Дӕ ном!

²⁰ О Дунедарӕг, Уӕларвӕфсады Бардарӕг, сног нын кӕн нӕ тых! Дӕ рухс цӕсгом нӕм равдис, ӕмӕ фервӕздзыстӕм!