Псаломтӕ 78 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Асафы псалом. О Хуыцау! Муртаттӕгтӕ ӕрбабырстой Дӕ зӕхмӕ, Дӕ уаз Кувӕндон фӕчъизи кодтой, Йерусалимы дур дурыл нал ныууагътой.

² Мӕргътӕн холыйӕн радтой Дӕ цагъарты мӕрдтӕ, хъӕддаг сырдтӕн — Дӕ сыгъдӕджыты буӕрттӕ.

³ Йерусалимы алыварс сӕ туг донау фӕкалди, ныгӕнӕг дӕр сӕ нал уыд.

⁴ Нӕ сыхӕгтӕн фидиссаг фестӕм, сӕхи ныл худӕгӕй хӕссынц, фидистӕ нын кӕнынц.

⁵ О Дунедарӕг, ӕнусмӕ нӕм мӕсты кӕндзынӕ? Артау кӕдмӕ судздзӕн Дӕ маст?

⁶ Дӕ азары хай бакӕн, Дӕу чи нӕ зоны, уыцы адӕмты, Дӕ ном чи нӕ ары, уыцы паддзахӕдтӕ.

⁷ Уымӕн ӕмӕ уыдон аныхъуырдтой Йаковы, сафтид ын кодтой йӕ зӕххытӕ.

⁸ Нӕ фыдӕлты тӕригъӕдтӕ махӕн фидинаг ма фӕкӕн, Дӕ хорзӕх ныл ӕвӕстиатӕй ӕруадз, науӕд байсысти нӕ хъару.

⁹ О Хуыцау, нӕ Ирвӕзынгӕнӕг, баххуыс нын кӕн Дӕ номы кадӕн, фервӕзын нӕ кӕн, ныббар нын нӕ тӕригъӕдтӕ Дӕ номы сӕраппонд!

¹⁰ Иннӕ адӕмтӕ цӕмӕн хъуамӕ дзурой, уӕдӕ кӕм ис сӕ Хуыцау, зӕгъгӕ? Дӕ цагъарты туг кӕй райстай, уый, уадз, адӕмтыл айхъуыса ӕмӕ мах уый нӕхи цӕстӕй фенӕм!

¹¹ Ахӕстыты дзыназын Дӕм фехъуысӕд! Мӕлӕт кӕмӕ ӕнхъӕлмӕ кӕсы, уыдоны Дӕ хъомысджын къухӕй бахиз!

¹² О Дунедарӕг, нӕ сыхӕгтӕ Дын цы фидистӕ фӕкодтой, уыдон сӕм авд ахӕмӕй раздах!

¹³ Мах та — Дӕ адӕм, Дӕ фысты дзуг — кад Дын кӕндзыстӕм ӕнустӕм, стаудзыстӕм Дӕ фӕлтӕрӕй фӕлтӕрмӕ!