Псаломтӕ 75 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Хъисфӕндырты цагъдимӕ. Асафы псалом. Зарӕг.

² Иудейы адӕм зонынц Хуыцауы, стыр у Йӕ ном Израилы адӕмы ’хсӕн.

³ Йӕ цатыр ис Салимы, Йӕ цӕрӕнбынат — Сионы хохыл.

⁴ Уыцы ран фыдгултӕн ныссаста сӕ зынг фӕттӕ, сӕ уартытӕ ӕмӕ сӕ кӕрдтӕ, тохы хӕцӕнгӕрзтӕ.

⁵ Дӕ тӕмӕнӕй ныррухс вӕййы дуне, Ды кадджындӕр — сырдарӕх хӕхтӕй.

⁶ Ӕхсарджын хӕстонтӕ фестадысты амӕттаг, мӕрдон фынӕй баисты; фидар хӕстонтӕй иунӕг дӕр йӕ къух сисын нӕ бафӕрӕзта.

⁷ О Йаковы Хуыцау, Ды сӕм бартхъирӕн кодтай, ӕмӕ бандзыг сты бӕхтӕ ӕмӕ бӕхджынтӕ.

⁸ Ды дӕ тасӕфтауӕг Хуыцау. Дӕ масты цӕфӕн чи бафӕраздзӕн?

⁹ Уӕларвӕй нын фехъусын кодтай Дӕ тӕрхон, ӕмӕ дуне фыр тӕссӕй ныссабыр,

¹⁰ Ды, Хуыцау, тӕрхон кӕнын куы райдыдтай ӕмӕ ӕфхӕрд адӕмы сӕрыл куы рахӕцыдтӕ, уӕд.

¹¹ Адӕмы фыдӕхы раз Дӕ кад ноджы фӕбӕрзонддӕр уыдзӕн. Дӕ азары фӕстӕ ма чи аирвӕза, уыдон дӕр ӕрсӕтдзысты Дӕ разы.

¹² Дунедарӕджы, уӕ Хуыцауы раз, дзырд дӕттут ӕмӕ-иу сӕххӕст кӕнут уӕ ныхас; Йӕ алыварс цы адӕмтӕ цӕры, уыдон иууылдӕр сӕ хуынтӕ хӕссӕнт тасӕфтауӕг Хуыцауӕн!

¹³ Уый бӕстыхицӕуттӕн сӕ ныфс асӕтты, а зӕххы паддзӕхтыл тас бафтауы.