Псаломтӕ 74 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. «Ма мӕ фесаф»-ы зӕлтӕм гӕсгӕ. Асафы псалом. Зарӕг.

² Кад Дын кӕнӕм, стауӕм Дӕ, Хуыцау! Ӕдзухдӕр нӕ былалгъыл ис Дӕ ном, адӕмӕн хъусын кӕнӕм Дӕ диссӕгтӕ.

³ «Афон куы ралӕууа, уӕд Ӕз раст тӕрхон кӕндзынӕн, — зӕгъы Хуыцау, —

⁴ зӕхх куы нынкъуыса, йӕ цӕрджытӕ ӕмризӕджы куы ризой, уӕд Ӕз фидар хӕцдзынӕн йӕ бындуртыл».

⁵ Сӕрыстыртӕн фӕдзӕхсын: «Уӕ хъал митӕ ныууадзут!» Ӕнаккӕгтӕн зӕгъын: «Ӕнӕрвӕссон ма ут!

⁶ Ӕгӕр бӕрзӕндты ма хӕссут уӕ сӕртӕ, схъӕл ныхасӕй хизут уӕхи!»

⁷ Мацы тӕрхонмӕ ӕнхъӕлмӕ кӕсут нӕдӕр скӕсӕнӕй, нӕдӕр ныгуылӕнӕй, нӕдӕр ӕдзӕрӕг быдырӕй, нӕдӕр хӕхтӕй.

⁸ Тӕрхонгӕнӕг у Хуыцау: иуы ӕрныллӕг кӕны, иннӕйы та бӕрзонд сисы.

⁹ Дунедарӕджы къухы ис ӕхсидгӕ сӕны кӕхц, маст хъацӕнтӕй — йедзаг, ӕмӕ Уый ӕгас зӕххы ӕнӕхуыцӕуттӕн уыцы сӕнӕй бануазын кӕндзӕн йӕ бынтӕм.

¹⁰ Ӕз та мыггагмӕ кад кӕндзынӕн ӕмӕ стаудзынӕн Йаковы Хуыцауы.

¹¹ Хуыцау зӕгъы: «Ӕнӕхуыцӕуттӕн се ’ппӕтӕн дӕр сӕ сыкъатӕ ныссӕтдзынӕн, рӕстгӕнджытӕн сӕ кад уыдзӕни бӕрзонд!»