Псаломтӕ 73 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Асафы зондамонӕн псалом. О Хуыцау, ӕнусмӕ ныл цӕмӕн бахъоды кодтай? Цӕмӕн рафыхт Дӕ маст Дӕ сӕрвӕты дзугмӕ?

² Ӕрымыс, незаманты кӕй равзӕрстай, кӕй балхӕдтай, ӕнустӕм Дӕ исбон кӕй скодтай, уыцы адӕмы, стӕй Сион — кӕм ӕрбынат кодтай, уыцы хох!

³ Ӕнусон хӕлддзӕгтӕм ӕркӕс: ныддӕрӕн кодтой знӕгтӕ Кувӕндон.

⁴ Дӕ Кувӕндоны Де знӕгтӕ рыхынц, сӕ тырыса дзы сауыгътой.

⁵ Бӕласы къалиутӕм фӕрӕт куыд сисынц, уыйау

⁶ дзӕккортӕй ӕмӕ фӕрӕттӕй нывӕфтыдтӕ ныссастой.

⁷ Дӕ Кувӕндон Дын басыгътой, Дӕ номы цӕрӕн фӕчъизи кодтой.

⁸ Дзырдтой сӕхинымӕр: «Бынтондӕр сӕ ныццӕгъдӕм!» Хуыцаумӕ-иу кӕм куывтам — ӕгас бӕстӕйы уыцы бынӕттӕ басыгътой.

⁹ Ӕвдисӕйнӕгтӕ нал уынӕм, пехуымпар нал ис, кӕд уыдзӕн адӕттӕн кӕрон, уый махӕй иунӕг дӕр нӕ зоны.

¹⁰ Хуыцау! Кӕдмӕ хынджылӕг кӕндзӕн знаг? Ӕнусмӕ фаудзӕни ныхмӕлӕууӕг Дӕ ном?

¹¹ Цӕмӕн айстай Дӕ къух, Дӕ рахиз къух? Сис Дӕ къух ӕмӕ сӕ бабын кӕн!

¹² О Хуыцау, ӕнусты райдианӕй Ды мӕ Паддзах дӕ! Ды зӕхмӕ ирвӕзындзинад ӕрхастай!

¹³ Дӕ хъаруйы фӕрцы денджызы уылӕнтӕ фӕцыдысты фӕйнӕрдӕм, ныссастай доны кӕлмытӕн сӕ сӕртӕ,

¹⁴ Левиафанӕн ныппырх кодтай йӕ сӕр, хъӕддаг сырдтӕн ӕй радтай холыйӕн.

¹⁵ Ды айгӕрстай фӕндаг донгуырӕнтӕн ӕмӕ суадӕттӕн, Дӕ хъомысӕй стыр цӕугӕдӕттӕ байсыстысты.

¹⁶ Дӕ бар цӕуы бон ӕмӕ ӕхсӕвыл; хур ӕмӕ мӕй Ды сфӕлдыстай.

¹⁷ Ды скодтай арӕнтӕ зӕххӕн, сӕрд ӕмӕ зымӕг Ды сфӕлдыстай.

¹⁸ Ӕркӕс-ма: знаг Дунедарӕджы фауы, ӕдылытӕ цъыф калынц Дӕ номыл.

¹⁹ Дӕ бӕлоны уд знӕгты къухмӕ ма ратт, Дӕ зӕрдӕсаст адӕмы рохуаты ма ныууадз бынтон.

²⁰ Ӕрымыс Дӕ фидыд! Зӕххыл алы тар къуым дӕр байдзаг ис тыхмийӕ.

²¹ Ӕфхӕрд лӕг ма аздӕхӕд ӕгадӕй, мӕгуыр ӕмӕ гӕвзыкк Дын сыстауӕнт Дӕ ном.

²² Сыст, Хуыцау, раст тӕрхон рахӕсс! Ӕркӕс-ма: ӕдылытӕ Дын ӕрвылбон Дӕ ном фауынц.

²³ Ма ферох кӕн, ам Де знӕгтӕн сӕ хъӕр кӕй хъуысы ӕмӕ ӕдзух кӕй змӕнтынц Дӕ ныхмӕ.