Псаломтӕ 70 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Дунедарӕг, Ды — мӕ хъахъхъӕнӕг, ӕмӕ ӕз никуы фегад уыдзынӕн.

² Дӕ рӕстадмӕ гӕсгӕ мӕ бахиз, фервӕзын мӕ кӕн, фехъус мӕ, ӕххуысмӕ мӕм фӕзын!

³ Айнӕг къӕдзӕх мын басгуых — мӕ сӕр-иу кӕм бафснайон. Фервӕзын мӕ кӕн: Ды — мӕ къӕдзӕх, мӕ фидар.

⁴ О мӕ Хуыцау, бахиз мӕ ӕнӕхуыцауӕй, фыдгӕнӕг ӕмӕ сурӕджы къухӕй.

⁵ Бардарӕг — Ды мӕ иунӕг ныфс, О Дунедарӕг, ме ’взонджы бонтӕй Дӕуыл дарын мӕ зӕрдӕ.

⁶ Мӕ райгуырдӕй фӕстӕмӕ Ды дӕ мӕ иунӕг ныфс, Дӕ фӕрцы рантыстӕн дунемӕ; кад Дын кӕнын кӕддӕриддӕр.

⁷ Бирӕтӕ мӕ диссагӕн хӕссынц, фӕлӕ мӕ зӕрдӕ Дӕуыл лӕууы.

⁸ Мӕ былалгъыл — Дӕуӕй ӕппӕлӕн ныхӕстӕ, ӕрвылбон Дын Де стырад стауын.

⁹ Мӕ зӕры бонты мыл ма атигъ кӕн Дӕхи, ма мӕ ныууадз, мӕ хъару куы байсыса, уӕд.

¹⁰ Ме знӕгтӕ фыдвӕндтӕ аразынц мӕ ныхмӕ, мӕ мӕлӕтмӕ у сӕ каст ӕмӕ дзурынц:

¹¹ «Хуыцау ӕй ныууагъта. Йӕ фӕстӕ зилут, хӕцут ыл! Ӕххуысгӕнӕг ын нӕй!»

¹² О Хуыцау, ма мӕ ныууадз! О Дунедарӕг, ӕххуысмӕ мӕм фӕзын!

¹³ Худинаджы бын фӕуӕнт ӕмӕ фесӕфӕнт, ӕнӕуынон кӕмӕн дӕн, уыдон! Фӕхудинаг уӕнт, аллайаг фӕуӕнт ме сӕфтмӕ бӕлджытӕ!

¹⁴ Ӕз кӕддӕриддӕр мӕ зӕрдӕ дардзынӕн Дӕуыл, кад Дын кӕндзынӕн ног ӕмӕ ногӕй.

¹⁵ Ӕрвылбон стаудзынӕн Дӕ рӕстад, Дӕ ирвӕзындзинад, уымӕн ӕмӕ Дӕ хорзӕхтӕ никуы фӕуыдзынӕн нымад.

¹⁶ Дунедарӕджы хъомысы кой кӕндзынӕн, Ды, иунӕг Ды кӕй дӕ раст, уый тыххӕй дзурдзынӕн.

¹⁷ О Дунедарӕг, ме ’взонджы бонтӕй фӕстӕмӕ мӕ Ды раст фӕндагыл аразыс, ӕмӕ абон онг Дӕ диссӕгты кой кӕнын.

¹⁸ О Хуыцау, ма мӕ ныууадз мӕ зӕры бонты, мӕ сӕр куы сурс уа, уӕд дӕр, цӕмӕй адӕмӕн Дӕ хъомысы, фидӕны фӕлтӕрӕн Дӕ хъаруйы кой ракӕнон.

¹⁹ О Дунедарӕг, Дӕ рӕстад — арвӕй уӕлдӕр, кӕуылты сты Дӕ хъуыддӕгтӕ! О Дунедарӕг, Дӕуӕн ӕмбал кӕм ис?

²⁰ Цас мыл ӕруагътай судзгӕ бӕллӕхтӕ, ӕмӕ мӕ ногӕй царды ныфс бауадз, арф дӕлдзӕхӕй мӕ ракӕн фӕстӕмӕ.

²¹ Ногӕй мӕ сбӕрзонд кӕн ӕмӕ та мын фӕлӕууын кӕн мӕ зӕрдӕ.

²² О мӕ Хуыцау! Хъисфӕндыры зӕлтӕй Дын скад кӕндзынӕн, Дӕ иузӕрдиондзинад Дын стаудзынӕн! Дыууадӕстӕноныл Дын кады зарӕг сисдзынӕн, о Израилы Уаз Хуыцау!

²³ Дӕ кады зарӕг ме ’взагӕй куы рацӕуы, уӕд мӕ уд дӕр фыр цинӕй райы, уымӕн ӕмӕ йӕ Ды фервӕзын кодтай!

²⁴ Ӕрвылбон ме ’взаг стауы Дӕ рӕстад, худинаджы бын фесты ме сӕфтмӕ бӕлджытӕ!