Псаломтӕ 7 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды шигаййон (ӕнкъард зарӕг) Дунедарӕгӕн, Куш ӕй, Бениамины мыггагӕй иу, азымы куы бадардта, уӕд.

² О Дунедарӕг, мӕ Хуыцау, Дӕумӕ агурын мӕхицӕн ӕмбӕхсӕн, ӕмӕ мӕ бахиз, мӕ фӕдыл зилджытӕй мӕ фервӕзын кӕн!

³ Науӕд мӕ акъабӕзтӕ кӕндзысты домбайау, ӕмӕ мын ӕххуысгӕнӕг нӕ уыдзӕни.

⁴ О Дунедарӕг, мӕ Хуыцау, кӕд, цы не ’мбӕлы, ахӕмӕй исты ракодтон, фыдракӕндӕй мӕ къухтӕ фӕчъизи кодтон,

⁵ кӕд, мемӕ хӕларӕй чи царди, уымӕн йӕ хорз ӕвзӕрӕй бафыстон, — ӕз, ӕнӕ исты ’фсонӕй-иу ме знаг чи сси, уый дӕр-иу чи фервӕзын кодта, —

⁶ уӕд фыдгул мӕ фӕдыл ӕфтыд фӕуӕд, раййафӕд мӕ, сыджыты бын мӕ фӕкӕнӕд, мӕ кад мын рыджы сӕвдулӕд!

⁷ О Дунедарӕг, Дӕ масты цӕхӕртӕ скал! Ме знӕт фыдгулты ныхмӕ ралӕуу! Ӕркӕс мӕм ӕмӕ рахӕц мӕ сӕрыл, цы тӕрхон рахастай, уый сӕххӕст кӕн!

⁸ Дӕ алыварс ӕрӕмбырд уыдзысты адӕмтӕ, Ды сӕ сӕрмӕ бӕрзонд Дӕ паддзахы бадӕны ӕрбад!

⁹ Дунедарӕг адӕмтӕн тӕрхон кӕны. О Дунедарӕг, равзар мын мӕ хъаст, мӕ рӕстадмӕ, ӕнӕкъӕм кӕй дӕн, уымӕ гӕсгӕ!

¹⁰ Фыдгӕнджыты хӕрам бамынӕг уӕд! Рӕстудӕн та фӕфидар кӕн йӕ зӕрдӕ, рӕстаг Хуыцау, — Ды фӕндтӕ ӕмӕ зӕрдӕтӕ фӕлварыс.

¹¹ Мӕ уарт — Хуыцау, рӕстзӕрдӕты Ирвӕзынгӕнӕг!

¹² Хуыцау у раст тӕрхонгӕнӕг, ӕрвылбон карзӕй дзуапп Чи домы, Уый.

¹³ Йӕ тӕригъӕдтыл чи не ’рфӕсмон кӕны, уыдоны бафхӕрынӕн рацӕгъды Йӕ кард, Йе ’рдынбос айвазы ӕмӕ сӕм ныхъхъавы.

¹⁴ Райсы мӕлӕтхӕссӕг гӕрзтӕ, ӕрцӕттӕ кӕны судзгӕ фӕттӕ.

¹⁵ Фыддзинад саразынмӕ чи хъавы, гуырдзау фыдвӕнд йӕ зӕрдӕйы чи хӕссы, уымӕй райгуыры мӕнгдзинад.

¹⁶ Искӕмӕн дзыхъхъ чи къахы, уый дзы йӕхӕдӕг ныххауы.

¹⁷ Йӕ фыдракӕнд йӕхи ныхмӕ рауайы, йӕхи сӕрыл ӕрцӕуы.

¹⁸ Стауын ӕз Дунедарӕджы рӕстад, зарын ӕз Иууылбӕрзонд Хуыцауы номы кадӕн!