Псаломтӕ 68 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Зарӕг «Хъоппӕг»-ы зӕлтӕм гӕсгӕ. Давиды псалом.

² О Хуыцау, баххуыс мын кӕн! Мӕ улӕфӕнтӕм схӕццӕ ис дон.

³ Арф цъымарайы ныссагъдтӕн, ӕмӕ дзы цӕуыл ӕрлӕууон, уый нӕй. Хуыдымы бахаудтӕн, ӕмӕ мӕ тагъд аныхъуырдзӕн.

⁴ Ӕрдиаг кӕнын дӕр нал у мӕ бон, мӕ хъӕлӕс ныффӕсус ис. Мӕ цӕстытӕ ныуурс сты, мӕ Хуыцаумӕ ӕнхъӕлмӕ кӕсгӕйӕ.

⁵ Ӕнаххосӕй ӕнӕуынон кӕмӕн сдӕн, уыдон мӕ сӕрыхъуынтӕй фӕфылдӕр сты. Сбирӕ сты ме знӕгтӕ, азымджын нӕ дӕн, афтӕмӕй зилынц мӕ фӕдыл. Никӕй бастыгътон, афтӕмӕй мӕ агурынц фиддон.

⁶ О Хуыцау, Ды зоныс ме ’нӕзонд митӕ, мӕ тӕригъӕдтӕ ӕмбӕхст не сты Дӕуӕй.

⁷ О Дунедарӕг, Уӕларвӕфсады Бардарӕг, ма мӕ фӕхудинаг кӕн, науӕд фегад уыдзысты, Дӕуыл йӕ зӕрдӕ чи дары, уыдон, о Израилы Хуыцау!

⁸ Уымӕн ӕмӕ ӕз Дӕ сӕраппонд фӕфидиссаг дӕн, мӕ цӕсгомыл худинаджы гакк сбадт.

⁹ Ме ’фсымӕртӕн сдӕн искӕйон, мӕ мады зӕнӕгӕн — ӕцӕгӕлон.

¹⁰ Дӕ Хӕдзары мӕт мӕ удхарӕй мары, Дӕ фыдгойгӕнджыты фидистӕ мӕ фауынц.

¹¹ Ӕз дзынӕзтон ӕмӕ ком дардтон — уый тыххӕй мын фидистӕ кӕнынц.

¹² Дарӕсы бӕсты мӕ уӕлӕ сӕхъис скодтон, ӕмӕ мӕ ӕмбисондӕн хӕссынц.

¹³ Сахары кулдуармӕ адӕм мӕ фыдгой кӕнынц, рассыггӕнджытӕ мыл айуаны зарджытӕ сисынц.

¹⁴ Фӕлӕ ӕз кувын Дӕумӕ, Дунедарӕг, хорз цӕстӕй мӕм куы кӕсыс, уыцы рӕстӕг. Де стыр хорзӕхы фӕрцы мӕ фехъус, фервӕзын мӕ кӕн Дӕ иузӕрдионы фӕрцы.

¹⁵ Цъымарайӕ мӕ слас, цӕмӕй дзы ма аныгъуылон, йе сӕфт мӕ чи уыны, уыдонӕй мӕ бахиз, ӕнӕбын хуыдымӕй мӕ фервӕзын кӕн,

¹⁶ науӕд мӕ йӕ уӕлныхты сисдзӕн ӕмӕ мӕ аныхъуырдзӕн, мӕ сӕрмӕ сӕхгӕндзӕн йӕ ком.

¹⁷ О Дунедарӕг, дзуапп мын ратт, Ды хӕларзӕрдӕ ӕмӕ иузӕрдион куы дӕ! Ӕркӕс мӕм, Дӕ хорзӕх бирӕ куы у!

¹⁸ Дӕ цагъарӕй Де ’ргом ма аздах, батагъд кӕн ӕмӕ мын дзуапп ратт — уымӕн ӕмӕ тынг тыхст дӕн!

¹⁹ Ӕрцу ӕмӕ мын фервӕзын кӕн мӕ уд, фервӕзын мӕ кӕн ме знӕгты фыддӕрагӕн.

²⁰ Ды зоныс, фидистӕ мын куыд кӕнынц, куыд мӕ ӕгад кӕнынц, аллайаг куыд фӕдӕн, уый! Мӕ фыдгултӕ иууылдӕр Дӕ разы сты.

²¹ Сӕ фидистӕй зӕрдӕсаст фӕдӕн, басасти мӕ хъару. Ӕнхъӕлмӕ кастӕн, исчи мын кӕд батӕригъӕд кӕнид, фӕлӕ ахӕм нӕ разынди; ӕнхъӕлмӕ кастӕн ныфсӕвӕрӕгмӕ, фӕлӕ ахӕмы дӕр не ссардтон.

²² Хойраджы бӕсты мын марг радтой, мӕ дойны та мын дзымарийӕ састой.

²³ Сӕ цӕл сын ахсӕн хыз фестӕд, сӕ минасы фынгтӕ — къӕппӕг.

²⁴ Сӕ цӕстырухс сыл баталынг уӕд, ӕндзыгнизӕй фӕсӕйӕнт, цӕрӕнбонты ӕдзухъом куыд уой, афтӕ.

²⁵ Дӕ фыдӕхы амӕттаг бауӕнт, Дӕ судзгӕ маст сӕ баййафӕд.

²⁶ Сӕ цӕрӕнуат гӕныстон фӕуӕд, сӕ цатырты цӕрӕг мауал баззайӕд.

²⁷ Уымӕн ӕмӕ, Ды кӕй ӕрцавтай, уыдонӕн сӕ фӕдыл зилынц, кӕй барӕхуыстай, уыдоны хъизӕмарыл цинӕй райынц.

²⁸ Ды сын сӕ алы тӕригъӕд дӕр ӕрымыс, сӕхи сраст кӕнын сӕ ма бауадз!

²⁹ Царды чиныгӕй сын ахахх кӕн сӕ нӕмттӕ, рӕстгӕнджыты хыгъдмӕ сӕ куыннӕ бахӕссой.

³⁰ Ӕз ӕфхӕрд дӕн ӕмӕ хъизӕмар кӕнын, фӕлӕ мын Ды, Хуыцау, баххуыс кӕндзынӕ, мӕ къӕхтыл мӕ слӕууын кӕндзынӕ.

³¹ Зарӕджы ӕппӕлдзынӕн Хуыцауы номӕй, Йе стырад Ын кады зарӕгӕй стаудзынӕн.

³² Уый Дын ӕхцондӕр уыдзӕн, Дунедарӕг, сыкъаджын ӕмӕ сӕфтӕгджын галтӕ ӕмӕ уӕнгуытӕй.

³³ Ӕфхӕрд адӕм уый куы феной, уӕд бацин кӕндзысты. Хуыцауы чи агуры, уыдонӕн сӕ зӕрдӕтӕ байдзаг уыдзысты царды ныфсӕй.

³⁴ Уымӕн ӕмӕ Дунедарӕг хъусы мӕгуырты лӕгъстӕтӕ, Йӕ адӕмы уацары нӕ ныууадздзӕн.

³⁵ Стауӕнт Ӕй арв, зӕхх, денджызтӕ ӕмӕ, сӕ мидӕг цыдӕриддӕр змӕлы, уыдон!

³⁶ Хуыцау баххуыс кӕндзӕни Сионӕн, сӕндидздзӕн Иудейы сахартӕ. Йӕ адӕм та дзы ногӕй ӕрцӕрдзысты, ӕмӕ сӕ исбойнаг зӕхх фӕстӕмӕ сӕхи бауыдзӕн.

³⁷ Хуыцауӕн кад чи кӕны, уыдоны байзӕддагӕн уыцы зӕхх баззайдзӕни фыдӕй-фыртмӕйы исбонӕн. Уым-иу ӕрцӕрдзысты, Хуыцауы чи уарзы, уыдон.