Псаломтӕ 61 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕг Йедутунӕн. Йедутуны мелодимӕ гӕсгӕ. Давиды псалом.

² Ӕрмӕстдӕр мын Хуыцау ратты ӕнцой, Уый мӕ фервӕзын кӕндзӕн.

³ Ӕрмӕстдӕр Уый у мӕ айнӕг къӕдзӕх, мӕ Ирвӕзынгӕнӕг, мӕ фидар гӕнах — ӕз никуы фӕкӕлдзынӕн.

⁴ Кӕд ныууадздзыстут уӕ фыдракӕндтӕ? Уӕ зӕрды ис адӕймаджы амарын! Сымах стут кӕлӕддзаг къулы, саст гӕрӕны ’нгӕс.

⁵ Уӕ зӕрды ис адӕймаджы бӕрзондӕй зӕхмӕ фехсын, фӕливын уын ӕхсызгон у. Дзыхы ныхасӕй арфӕтӕ кӕнынц, зӕрдӕйӕ та — ӕлгъитгӕ.

⁶ Ӕрмӕст Хуыцаумӕ ссар ӕнцой, мӕ уд! Мӕ зӕрдӕдарӕн Уый у!

⁷ Иунӕг Хуыцау — мӕ айнӕг къӕдзӕх, мӕ Ирвӕзынгӕнӕг, мӕ хъахъхъӕнӕг сис — ӕз никуы фӕкӕлдзынӕн.

⁸ Хуыцау — мӕ Ирвӕзынгӕнӕг, мӕ кад, мӕ фидар къӕдзӕх, ме ’мбӕхсӕн.

⁹ О адӕм! Уӕ зӕрдӕ Йыл кӕддӕридӕр дарут, ӕргом Ын кӕнут уӕ зӕрдӕйы сусӕгтӕ; нӕ ныфсы мӕсыг — Хуыцау.

¹⁰ Адӕймаг ницы у, лӕджы фырттӕ сты мӕнг; барӕнтыл сӕ куы ӕрӕвӕрай, уӕд иууылдӕр иумӕ — уӕлдӕфӕй рогдӕр.

¹¹ Давӕггӕгтӕй ма ут ныфсджын, ӕфтиӕгты фӕрцы ма фервӕссут уӕхиуыл, куы схъӕздыг уат, уӕд уӕ зӕрдӕ мулчы фӕдыл ма сӕрра уӕд.

¹² Дунедарӕг ӕй иу хатт загъта, хъусгӕ та йӕ дыууӕ хатты фӕкодтон: хъару Дунедарӕгмӕ ис.

¹³ О Дунедарӕг, Дӕумӕ ис хорзӕх. Ды алкӕмӕн дӕр йӕ хъуыддӕгтӕм гӕсгӕ бафидыс.