Псаломтӕ 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн: хъисфӕндырты цагъдимӕ; ныллӕг хъӕлӕсӕй. Давиды псалом.

² Курын Дӕ, о Дунедарӕг, Дӕ маст куы судза, уӕд мыл Дӕ азар ма ныххуырс! Фыр мӕстӕй цӕхӕртӕ куы калай, уӕд-иу мӕ ма бафхӕр карзӕй!

³ Батӕригъӕд кӕн, Дунедарӕг, уымӕн ӕмӕ ӕнӕбон дӕн. Сдзӕбӕх мӕ кӕн, Дунедарӕг, — ме стджыты онг баризы мӕ буар,

⁴ мӕ уд хъизӕмар кӕны. О Дунедарӕг, кӕдмӕ уыдзӕни афтӕ?

⁵ Раздах мӕм Де ’ргом, Дунедарӕг, бахиз мӕ мӕлӕтӕй! Дӕ хорзӕх мӕ кӕй ис, уый фӕрцы мӕ фервӕзын кӕн!

⁶ Чи амӕла, уый Дӕ нал ӕрымысдзӕн. Мӕрдтыбӕсты Дӕ чи сыстаудзӕн?

⁷ Бафӕлладтӕн мӕ хъӕрзынӕй, ӕрвылӕхсӕв мӕ сынтӕджы калын мӕ цӕссыг, цӕстысыгӕй мӕ хуыссӕнуат ныхсын.

⁸ Мӕ цӕстыты рухс ахуыссыди мастӕй, ме знӕгты фыдӕй рӕстмӕ уынгӕ дӕр нал кӕнын.

⁹ Фесӕфут мӕ разӕй, фыдгӕнджытӕ, — Дунедарӕг мын фехъуыста мӕ дзыназын!

¹⁰ Дунедарӕг мын фехъуыста мӕ курдиат, Дунедарӕг мын айсдзӕни мӕ куывд!

¹¹ Ме знӕгтӕ фӕхудинаг уыдзысты, састы бынаты баззайдзысты, лидзӕг фӕуыдзысты ӕгадӕй.