Псаломтӕ 57 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. «Ма мӕ фесаф»-ы зӕлтӕм гӕсгӕ. Давиды куывд.

² Уӕ уынаффӕтӕ уӕм раст кӕсынц, тӕрхонгӕнджытӕ? Раст тӕрхон хӕссут адӕмӕн?

³ Уӕ мидзӕрдӕйы фыдвӕндтӕ нывӕндут, зӕххыл уӕ къухтӕ аразынц тыхми.

⁴ Ӕнӕхуыцӕуттӕ сӕ райгуырдӕй фӕстӕмӕ галиу фӕндагыл лӕууынц, сӕ райгуырынӕй адзӕгъӕл сты, сайынц.

^5-6 Сӕ марг у калмы марг, сӕхӕдӕг та, йӕхи чи ныкъкъуырма кӕны, кӕлӕнгӕнӕджы хъӕлӕс ма фехъусон, зӕгъгӕ, уыцы маргджын калмау.

⁷ О Хуыцау, сӕ дӕндӕгтӕ сын базгъал! О Дунедарӕг, домбӕйттӕн се ’фсӕртӕ ныппырх кӕн!

⁸ Фесӕфӕнт зӕххы ахъарӕг донау! Се ’рдынбостӕ куы айвазой, уӕд сӕ фӕттӕ асӕттӕнт!

⁹ Фесӕфӕнт йӕ хъузгӕй ралӕсӕг сӕтӕлӕгау! Боны рухс ма фенӕнт ӕфтыддагау!

¹⁰ Цы сыл ӕрбамбӕлд, уый ӕмбаргӕ дӕр нӕма бакӕндзысты, афтӕмӕй фӕцыдӕр уыдзысты, карз уад куы рацӕуы, уӕд какон сындзытӕ, ичъи ӕмӕ амахос, цъӕхӕй, хусӕй куыд фӕцыдӕр вӕййынц, афтӕ.

¹¹ Рӕстуд цинӕй райдзӕни, Хуыцау ын ӕнӕхуыцӕуттӕй йӕ маст куыд райста, уый фенгӕйӕ, ӕмӕ йӕ къӕхтӕ ӕнӕхуыцӕутты туджы ӕрӕхсдзӕн.

¹² Адӕм зӕгъдзысты: «Рӕстуд йӕ хӕрзиуӕджы хай райста! Ӕцӕгдӕр ис Хуыцау, зӕххыл тӕрхон Чи кӕны, Уый!»