Псаломтӕ 56 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. «Ма мӕ фесаф»-ы зӕлтӕм гӕсгӕ. Давиды куывд, Саулӕй лӕгӕты йӕхи куы бааууон кодта, уӕд.

² Батӕригъӕд мын кӕн, Хуыцау, батӕригъӕд мын кӕн! Дӕуыл дарын мӕ зӕрдӕ. Дӕ базыры бын мӕ бакӕн, цалынмӕ мӕм фыдбылыз кӕсы, уӕдмӕ!

³ Ӕз дзыназын Иууылбӕрзонд Хуыцаумӕ, Чи мыл ауды, Уымӕ.

⁴ Уый мын Йе ’ххуыс ӕрӕрвитдзӕн уӕларвӕй ӕмӕ мӕ фервӕзын кӕндзӕн, фегад кӕндзӕн Мӕ фӕдылзилджыты. Хуыцау мыл ӕруадздзӕни Йӕ хорзӕх, Йе ’цӕгады фарн.

⁵ Тугдзых домбӕйтты, лӕгхорты ахӕсты фӕдӕн. Сӕ дӕндӕгтӕ — ӕрцытӕ ӕмӕ фаттӕ, се ’взӕгтӕ — цыргъ кӕрдтӕ.

⁶ О Хуыцау, арвӕй бӕрзонддӕр уӕд Дӕ кад, тӕмӕнтӕ калӕд ӕгас зӕххы сӕрмӕ!

⁷ Мӕ къӕхты размӕ мын сӕвӕрдтой къӕппӕг, ӕмӕ мӕ удӕн асасти йӕ ныфс; мӕ фӕндагыл скъахтой уӕрм, фӕлӕ дзы ныххаудысты сӕхӕдӕг.

⁸ Мӕ зӕрдӕ фӕфидар ис, Хуыцау, фӕфидар ис мӕ зӕрдӕ: ӕз зардзынӕн, зарӕгӕй Дӕ стаудзынӕн.

⁹ Уӕдӕ райхъал у, мӕ уд, райхъал ут, дыууадӕстӕнон ӕмӕ хъисфӕндыр! Ӕз хуры дӕр райхъал кӕндзынӕн!

¹⁰ Дунедарӕг, ӕппӕт адӕмты ’хсӕн Дӕ стаудзынӕн, алы знӕмты раз Дын кады зарӕг сисдзынӕн!

¹¹ Дӕ хорзӕх хӕццӕ кӕны уӕлӕрвтӕм, Дӕ иузӕрдиондзинад — ӕврӕгъты онг!

¹² О Хуыцау, арвӕй бӕрзонддӕр уӕд Дӕ кад, тӕмӕнтӕ калӕд ӕгас зӕххы сӕрмӕ!