Псаломтӕ 54 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Хъисфӕндырты цагъдимӕ. Давиды зондамонӕн псалом.

² О Хуыцау, фехъус мын мӕ куывд, мӕ лӕгъстӕйыл мын Дӕхи ма атигъ кӕн!

³ О, фехъус мӕ ӕмӕ мын дзуапп ратт! Хъӕрзын мӕ мастӕй, катайы бацыдтӕн,

⁴ уымӕн ӕмӕ знаджы хъӕлӕс хъусын. Мӕ фыдгултӕ мӕ ссӕндынц, мӕнг даутӕ мыл ӕххуырсынц. Мӕстӕй судзгӕйӕ, тох кӕнынц мӕ ныхмӕ.

⁵ Мӕ зӕрдӕ сӕнкъуысы мӕ мидӕг, мӕлӕтдзаг тасӕй уадзыгау фӕдӕн.

⁶ Фыр тӕссӕй ӕмризӕджы ризын, фыд азар мӕ ӕрбалвӕста.

⁷ Ӕз загътон: «Тӕхуды ӕмӕ мын исчи бӕлоны базыртӕ куы раттид, ӕз атӕхин ӕмӕ ӕнцой ссарин.

⁸ Дард фӕтӕхин, ӕдзӕрӕг быдыры ӕрцӕрин,

⁹ ӕвӕстиатӕй бамбӕхсин мӕхи тыхдымгӕ ӕмӕ уадӕй».

¹⁰ О Дунедарӕг, схъомпал сӕ кӕн, сӕ ныхас кӕрӕдзиуыл куыннӕуал бада, — ӕз сахары уынын хъаугъатӕ ӕмӕ тыхми.

¹¹ Ӕхсӕвӕй-бонӕй зилдух кӕнынц сахары систыл, йӕ мидӕг та — фыдракӕндтӕ, бӕллӕхтӕ.

¹² Сахар цӕуы сӕфтмӕ, йӕ уынгты ’рцардысты фӕлывд ӕмӕ мӕнгарддзинад.

¹³ Знаг нӕ кӕны мӕ фыдгой — ӕз уымӕн бафӕразин. Йе сӕфт мӕ чи уыны, уый мӕм нӕ кӕсы былысчъилӕй — мӕхи дзы иуварс аласин.

¹⁴ Фӕлӕ ды, мӕхицӕн ӕрдхорд кӕмӕй загътон, ӕмбалыл ӕмӕ уарзон хӕларыл кӕй нымадтон!

¹⁵ Иумӕ-иу зӕрдӕбын ныхас кодтам, Хуыцауы хӕдзармӕ дӕр иумӕ цыдыстӕм.

¹⁶ Сӕ мӕлӕт ссарӕнт, цӕрдудӕй мӕрдтыбӕстӕм ныххизӕнт, уымӕн ӕмӕ сӕ хӕдзӕртты ӕрцарди фыддзинад!

¹⁷ Ӕз та сдзынӕзтон Хуыцаумӕ, ӕмӕ мӕ Дунедарӕг фервӕзын кӕндзӕн.

¹⁸ Изӕрӕй уа, райсомӕй ӕви ӕмбисбон — дзыназдзынӕн ӕмӕ лӕгъстӕ кӕндзынӕн, ӕмӕ мын Уый фехъусдзӕни мӕ хъӕлӕс.

¹⁹ Мӕ ныхмӕ хӕст чи расидти, уыдон цыфӕнды бирӕ куы уой, уӕд дӕр мӕ Уый сӕрӕгасӕй ныууадздзӕн.

²⁰ Йӕ паддзахдзинад ӕнусон Кӕмӕн у, Уыцы Хуыцау мын мӕ куывд фехъусдзӕн ӕмӕ сӕ басӕтдзӕн, уымӕн ӕмӕ, цы уыдысты, уымӕй баззадысты, нӕ тӕрсынц Хуыцауӕй.

²¹ Семӕ хӕларӕй чи цӕры, уыдонмӕ сӕ къух систой, сӕ фидыд фехӕлдтой.

²² Сӕ ныхас — сойӕ лӕгъздӕр, сӕ зӕрдӕйы та — хӕст. Сӕ ныхӕстӕ — оливӕйы сойӕ фӕлмӕндӕр, афтӕмӕй сын ӕлвӕст кардӕй уӕлдай не сты.

²³ Дунедарӕгыл бафӕдзӕхс дӕхи, ӕмӕ дын Уый ахъаз бакӕндзӕн, раст адӕймаджы мыггагмӕ дӕр фӕцудын нӕ бауадздзӕн.

²⁴ О Хуыцау, Ды уыдоны сӕрсӕфӕнмӕ фехсдзынӕ; тугцъиртӕ ӕмӕ мӕнгӕрдтӕ сӕ царды ӕмбис дӕр нӕ фӕцӕрдзысты. Ӕз та мӕ зӕрдӕ дарын Дӕуыл.