Псаломтӕ 48 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Корахы фыртты псалом.

² Байхъусут, ӕппӕт адӕмтӕ, уӕ хъус ӕрдарут, дун-дунейы ӕппӕт цӕрджытӕ:

³ хуымӕтӕгтӕ ӕмӕ номдзыдтӕ, хъӕздгуытӕ ӕмӕ мӕгуыртӕ.

⁴ Мӕ дзыхӕй рацӕудзӕни уӕлзонд, мӕ зӕрдӕйы сагъӕстӕй — зонынад.

⁵ Мӕ хъус ӕрдардзынӕн фӕсномыг ныхасмӕ, хъисфӕндыры зӕлтӕм уыци-уыци райхалдзынӕн.

⁶ Бӕллӕхы бон ма ӕз цӕмӕй хъуамӕ фӕтӕрсон, мӕнгарддзинад ӕмӕ фыддзинад мыл куы ’рхъула кодтой, уӕд?

⁷ Йӕ тыхӕй — ныфсджын, йӕ мулкӕй хъал чи у, уыдон!

⁸ Йӕ хионы уӕ ничи балхӕндзӕни мӕлӕтӕй, йӕ уды аргъ ын ничи бафиддзӕни Хуыцауӕн.

⁹ Тынг стыр у уд балхӕныны аргъ, ӕмӕ мыггагмӕ дӕр уый нӕ уыдзӕн,

¹⁰ цӕмӕй исчи ӕнустӕм фӕцӕра ӕмӕ мӕлӕт ма фена.

¹¹ Кӕсыс: куырыхонтӕ дӕр мӕлынц, ӕдылытӕ куыд мӕлынц, афтӕ, сӕ мулк та баззайы кӕмӕндӕр.

¹² Ингӕн — се ’нусон цӕрӕн. Афтӕмӕй та сӕ хӕдзӕртты ӕнусмӕ цӕринаг уыдысты, суанг сӕ зӕххытӕ дӕр рахуыдтой сӕхи нӕмттӕй.

¹³ Фӕлӕ адӕймагӕн йӕ кад бирӕ нӕ ахӕсдзӕн, амӕлдзӕни, фос куыд амӕлынц, афтӕ.

¹⁴ Ахӕм у, йӕ зӕрдӕ йӕхиуыл чи дары, уыдоны хъысмӕт, стӕй, сӕ фӕдыл цӕуын чи уарзы, уыдоны кӕрон.

¹⁵ Фыстау сӕ ныппардзысты мӕрдтыбӕстӕм, мӕлӕт сын суыдзӕни фыййау. Ралӕудзӕни райсом — рӕстудтӕ сыл фӕуӕлахиз уыдзысты; сӕ кой дӕр фесӕфдзӕн, сӕ цӕрӕн суыдзӕни мӕрдтыбӕстӕ.

¹⁶ Мӕн та Хуыцау бахиздзӕни мӕрдтыбӕстӕй, райсдзӕни мӕ Йӕхимӕ!

¹⁷ Цардыл чи фӕхӕст ӕмӕ йӕ хӕдзары кад уӕлӕмӕ кӕмӕн цӕуы, уымӕй ма фӕтӕрс:

¹⁸ мӕрдтӕм дзы йемӕ ницы ахӕсдзӕн ӕмӕ йӕ кад йӕ фӕдыл нӕ ныххиздзӕн.

¹⁹ Кӕд йӕ цӕргӕйӕ йӕхи амондджыныл нымадта, ӕмӕ, йӕхицӕн амал кӕй зыдта, уый тыххӕй дзы ӕппӕлыдысты,

²⁰ уӕддӕр, рухс чи нал фендзӕн, уыцы фыдӕлтыл бафтдзӕни.

²¹ Кадджын, фӕлӕ ӕнӕмбаргӕ чи у, уый дӕр амӕлдзӕн, фос куыд амӕлынц, афтӕ.