Псаломтӕ 46 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Корахы фыртты псалом.

² Ӕрӕмдзӕгъд кӕнут, ӕппӕт адӕмтӕ, цины хъӕртӕй сыстаут Хуыцауы!

³ Тасӕфтауӕг у Бӕрзӕндтыл Бадӕг Хуыцау — ӕгас зӕххы Стыр Паддзах!

⁴ Уый нӕ разы басаста адӕмты, нӕ къӕхты бынмӕ ӕрӕппӕрста знӕмты.

⁵ Йӕхӕдӕг нын равзӕрста фыдӕй-фыртмӕйы исбон — Йӕ уарзон Йаков хъал кӕмӕй у, уыцы бынтӕ.

⁶ Цины уынӕримӕ Хуыцау ссыди уӕлӕмӕ, ссыди Хуыцау сыкъауадындзы зӕлтимӕ.

⁷ Кады зарӕг зарут Хуыцауӕн, зарут! Кады зарӕг сисут нӕ Паддзахӕн, сисут!

⁸ Хуыцау у ӕгас зӕххы Паддзах, аив зарӕг Ын зарут!

⁹ Хуыцау у адӕмты паддзах, Хуыцау ӕрбадти Йӕ уаз паддзахы бадӕны!

¹⁰ Адӕмты фӕтӕгтӕ ӕрбамбырд уыдзысты Авраамы Хуыцаумӕ, уымӕн ӕмӕ зӕххы барджынтӕ Хуыцауы сты; бӕрзонд у Уымӕн Йӕ кад.