Псаломтӕ 41 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Корахы фыртты зондамонӕн псалом.

² Саг суадонмӕ куыд фӕтырны, афтӕ мӕ уд тырны Дӕумӕ, Хуыцау!

³ Мӕ уд бӕллы Хуыцаумӕ, цардӕгас Хуыцаумӕ! Кӕд бацӕудзынӕн ӕмӕ Хуыцауы раз кӕд ӕрлӕудзынӕн?

⁴ Мӕ цӕссыгтӕй ӕхсӕвӕй-бонӕй цӕхсын мӕхи, ӕрвылбон хъусын: «Кӕм ис дӕ Хуыцау?»

⁵ Мӕ зӕрдӕйы тугтӕ ныккӕлынц, уый куы ӕрымысын, уӕд: ӕз-иу цины хъӕртимӕ, Хуыцауы стаугӕйӕ, бӕрӕгбонхуыз дзыллӕимӕ цыдтӕн Хуыцауы хӕдзармӕ.

⁶ Мӕ уд, цы ныхъхъуыстай дӕхимӕ, цӕуыл у дӕ сагъӕс? Хуыцауыл дӕ зӕрдӕ дар: ӕз Ӕй нырма стаудзынӕн — мӕ Ирвӕзынгӕнӕджы, мӕ Хуыцауы.

⁷ Мӕ уд хъынцъым кӕны мӕ мидӕг, ӕмӕ Дӕ мысын Иорданы зӕххыл, Ермоны хӕхбӕсты, Мицары хохыл.

⁸ Хуыдым сиды хуыдыммӕ Де ’хсӕрдзӕнты хъӕлӕсӕй; Дӕ дӕттӕ ӕмӕ Дӕ уылӕнтӕ акалдысты мӕ сӕрты.

⁹ Дунедарӕг мын боныгон равдисы Йӕ хорзӕх, ӕмӕ ме ’хсӕвы зарӕг вӕййы Ууыл — мӕ царддӕттӕг Хуыцауыл.

¹⁰ Ӕз зӕгъдзынӕн Хуыцауӕн, мӕ Къӕдзӕхӕн: «Цӕмӕн мӕ ферох кодтай? Цӕмӕн мӕ уадзыс ме знагӕн ӕфхӕрын, кӕугӕйӕ цӕмӕн ӕрвитын мӕ бонтӕ?»

¹¹ Уӕнгсастау дӕн, ӕмӕ мыл мӕ фыдгултӕ худынц: «Кӕм ис дӕ Хуыцау?»

¹² Мӕ уд, цы ныхъхъуыстай дӕхимӕ, цӕуыл у дӕ сагъӕс? Хуыцауыл дӕ зӕрдӕ дар: ӕз Ӕй нырма стаудзынӕн — мӕ Ирвӕзынгӕнӕджы, мӕ Хуыцауы.