Псаломтӕ 4 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн: хъисфӕндырты цагъдимӕ. Давиды псалом.

² О Хуыцау, фехъус мын мӕ хъӕр! Ӕрмӕстдӕр мӕ Ды сраст кӕндзынӕ! Ды-иу мӕ фервӕзын кодтай уынгӕджы заман. Батӕригъӕд кӕн ӕмӕ мын айс мӕ куывд!

³ О адӕм, кӕдмӕ калдзыстут цъыф мӕ номыл? Кӕдмӕ уын уыдзысты адджын мӕнг хъуыддӕгтӕ ӕмӕ фӕливӕнтӕ?

⁴ Уый зонут, ӕмӕ Дунедарӕг фӕхъулон кӕны, ӕнувыд Ыл чи у, уыдоны. Ӕз Дунедарӕгмӕ куы скувын, уӕд мӕ Уый фехъусы!

⁵ Уӕ масты фӕдыл цӕугӕйӕ, тӕригъӕд ма исут уӕхимӕ; уӕ хуыссӕнуаты ахъуыды кӕнут ӕмӕ ӕрсабыр ут.

⁶ Нывӕндтӕ хӕссут, куыд ӕмбӕлы, афтӕ ӕмӕ Дунедарӕгыл уӕ зӕрдӕ дарут.

⁷ Бирӕтӕн сӕ ныхас уый у: «Чи нын цы ракӕндзӕн хорзӕй?» Дунедарӕг, Дӕ цӕсгомы рухс нӕм равдис!

⁸ Ды мӕ зӕрдӕйы ахӕм цин бауагътай, йӕ хор ӕмӕ йӕ сӕнӕн, ныккӕнӕн дӕр кӕмӕн нӕй, уыдоны цинӕй фылдӕр чи у!

⁹ Ӕнцад-ӕнцойӕ ӕрхуыссын ӕз ӕмӕ бафынӕй вӕййын, уымӕн ӕмӕ, о Дунедарӕг, ӕрмӕстдӕр дӕ фӕрцы дӕн ӕдас!