Псаломтӕ 35 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Дунедарӕджы цагъар Давиды конд.

² Ӕнӕхуыцауӕн адджын у тӕригъӕд, Хуыцауы тас ӕм нымады дӕр нӕу.

³ Ныббуц вӕййы йӕхицӕй, цыма йӕ азым базыдта ӕмӕ дзы йе сӕфт федта, уыйау.

⁴ Йӕ ныхӕстӕ — хинӕйдзаг ӕмӕ мӕнг; нӕдӕр уӕлзондмӕ тырны, нӕдӕр — хорздзинад ракӕнынмӕ.

⁵ Суанг йӕ хуыссӕны дӕр аразы фыдвӕндтӕ.

⁶ О Дунедарӕг! Дӕ хорзӕх хӕццӕ кӕны уӕлӕрвтӕм, Дӕ иузӕрдиондзинад — ӕврӕгъты онг!

⁷ Дӕ рӕстад — Хуыцауы хӕхтау бӕрзонд, Дӕ раст тӕрхон — ӕнӕбын хуыдымау! Адӕмыл дӕр ӕмӕ фосыл дӕр аудыс, Дунедарӕг!

⁸ О Хуыцау, Дӕ хорзӕхӕн аргъ нӕй! Дӕ базыры бын бакодтай адӕмы,

⁹ Дӕ хойрагӕй сӕ ’фсадыс, сӕ дойны сын сӕттыс Дӕ цины цӕугӕдӕттӕй.

¹⁰ Уымӕн ӕмӕ Ды дӕ царды суадон, Дӕ рухсы мах уынӕм рухс.

¹¹ Дӕ хорзӕхы аккаг скӕн, чи Дӕ зоны, уыдоны, Дӕ рӕстады фарнӕй схайджын кӕн рӕстзӕрдӕты!

¹² Уадз, сӕрыстыр мӕн йӕ къӕхты бын ма ныссӕнда, фыдлӕгты къух мӕ, уадз, ма фӕсура.

¹³ Фӕкалдысты фыдгӕнджытӕ: афӕлдӕхтой сӕ — нал сын бантысдзӕни сыстын.