Псаломтӕ 26 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. Дунедарӕг — мӕ царды рухс, мӕ ирвӕзынгӕнӕг: кӕмӕй мын у тас? Дунедарӕг — мӕ царды мӕсыг: кӕй тӕссӕй хъуамӕ нырризон?

² Фыдгӕнджытӕ мӕ ныхмӕ куы рацӕуой мӕ буар мын аныхъуырын мондагӕй, мӕ фыдгултӕ, ме знӕгтӕ мӕм куы лӕбурой, уӕд фӕкӕлдзысты ӕмӕ ’рхаудзысты.

³ Ӕнӕхъӕн ӕфсад куы ’рлӕууа мӕ ныхмӕ, уӕд дӕр нӕ фӕтӕрсдзынӕн. Хӕст куы райдайа, уӕд дӕр мӕ ныфс нӕ асӕтдзӕн.

⁴ Ӕрмӕстдӕр иу хорзӕх Дунедарӕгӕй курын, иунӕг фӕндон мӕм ис: мӕ царды бонтӕ куы арвитин Дунедарӕджы хӕдзары, цӕмӕй Дунедарӕджы рӕсугъддзинад уынон, Йӕ рухс Кувӕндонмӕ Йын цӕуон.

⁵ Дунедарӕг мӕ бӕллӕхы заман бамбӕхсдзӕни Йӕ цӕрӕны, бааууон кӕндзӕни Йӕ Цатыры, сисдзӕни мӕ къӕдзӕхы сӕрмӕ.

⁶ Уӕд ӕз фӕуӕлахиз уыдзынӕн, чи мыл ӕртыхсти, уыцы фыдгултыл ӕмӕ Дунедарӕджы Цатыры ӕрхӕсдзынӕн нывӕндтӕ, стаудзынӕн Ӕй, зардзынӕн Йӕ кадӕн.

⁷ О Дунедарӕг, фехъус мын мӕ дзыназын, батӕригъӕд кӕн, дзуапп мын ратт!

⁸ Мӕ зӕрдыл ӕдзухдӕр лӕууы Дӕ фӕдзӕхст: «Ме ссарынмӕ тырнут!» Ӕмӕ ӕз ӕдзухдӕр тырнын Дӕумӕ, о Дунедарӕг!

⁹ Де ’ргом мӕ ма аздах! Фыдӕхы хӕрам ма фӕу дӕ цагъармӕ. Ды уыдтӕ ме ’ххуысгӕнӕг ӕмӕ мыл ныр дӕр Дӕхи ма атигъ кӕн, ма мӕ ныууадз, о Хуыцау, мӕ Ирвӕзынгӕнӕг!

¹⁰ Мӕ фыд ӕмӕ мӕ мад мӕ ныууагътой, фӕлӕ мӕ Ды, Дунедарӕг, Дӕхимӕ ’рбахӕстӕг кӕндзынӕ.

¹¹ О Дунедарӕг, сахуыр мӕ кӕн Дӕ фӕндагыл цӕуын! Раст фӕндагыл мӕ сараз — мӕ фыдгулты фыдӕнӕн!

¹² Ме знӕгты амӕттаг мӕ ма фӕкӕн! Мӕнгӕвдисӕнтӕ ралӕууыдысты мӕ ныхмӕ, фыр мӕстӕй цъӕх арт уадзынц.

¹³ Фӕлӕ мӕн уырны, уӕлӕуыл ма кӕй цӕрдзынӕн, Дунедарӕджы хорзӕх ма кӕй фендзынӕн.

¹⁴ Дунедарӕгыл дӕ зӕрдӕ дар! Фидар лӕуу, ӕмӕ дӕ зӕрдӕ мацӕмӕ ’хсайӕд! Дунедарӕгыл дӕ зӕрдӕ дар!