Псаломтӕ 19 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Давиды псалом.

² Дӕ хъыджы заман дӕ Дунедарӕг фехъусӕд, Йаковы Хуыцауы ном дӕ хъахъхъӕнӕд!

³ Йе ’ххуысы хай дын рарвитӕд Йӕ Кувӕндонӕй, хъару — Сионы хохӕй!

⁴ Де ’ппӕт хуынтӕ дын ӕрымысӕд, дӕ иууылсудзинӕгтӕ дын айсӕд.

⁵ Дӕ зӕрдӕ цӕмӕ бӕллы, уыдон дын Йӕ цӕст бауарзӕд! Де ’ппӕт фӕндтӕ дӕ къухы цы бафтой, уыцы ахъаз дын бакӕнӕд!

⁶ Махӕн та ахӕм арфӕ ракӕнӕд, ӕмӕ дын дӕ уӕлахизыл цин куыд кӕнӕм, нӕ Хуыцауы номыл бӕрзонд куыд сисӕм уӕлахизы тырыса! Дӕуӕн та Дунедарӕг дӕ курдиӕттӕ иууылдӕр сӕххӕст кӕнӕд!

⁷ Ныр ӕз зонын, Дунедарӕг Йӕ байсӕрст паддзахы кӕй ирвӕзын кӕны. Йӕ уаз уӕлӕрвтӕй йын фехъусы йӕ сидт, Йӕ рахиз къухы хъомысӕй йын ратты уӕлахиз.

⁸ Чи йӕ тохуӕрдӕттӕй ӕппӕлы, чи — йӕ бӕхтӕй, мах та стауӕм Дунедарӕджы, нӕ Хуыцауы, ном.

⁹ Уыдон фӕцудыдтой ӕмӕ ӕрхаудысты, мах та сыстадыстӕм ӕмӕ фидар лӕууӕм.

¹⁰ О Дунедарӕг, ратт уӕлахиз паддзахӕн! Фӕдисхъӕр Дӕм куы ныккӕнӕм, уӕд-иу нӕ фехъус!