Псаломтӕ 148 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алелуйа! Стаут Дунедарӕджы уӕлӕрвтӕй, стаут Дунедарӕджы бӕрзӕндты.

² Стаут Ӕй, Йе ’ппӕт зӕдтӕ, стаут Ӕй, Йе ’ппӕт ӕфсӕдтӕ.

³ Стаут Ӕй, хур ӕмӕ мӕй, стаут Ӕй, цӕхӕркалгӕ стъалытӕ.

⁴ Стаут Ӕй, уӕлӕрвты сӕрмӕ уӕлдунетӕ, арвы сӕрмӕ цы дӕттӕ ис, уыдон.

⁵ Стауӕнт се ’ппӕт дӕр Дунедарӕджы ном, уымӕн ӕмӕ Уый бардзырд радта, ӕмӕ фӕзындысты.

⁶ Сӕвӕрдта сӕ мыггагмӕ, радта сын ӕгъдау, ӕмӕ йӕ сӕрты нӕ ахиздзысты.

⁷ Дунедарӕджы стаут, зӕххон цӕрджытӕ, стыр кӕсӕгтӕ ӕмӕ фурды ӕрфытӕ,

⁸ арт ӕмӕ их, мит ӕмӕ мигъ, Йӕ ныхас ӕххӕстгӕнӕг уаддымгӕ,

⁹ хӕхтӕ ӕмӕ ӕппӕт къуылдымтӕ, дыргъбӕлӕстӕ ӕмӕ ӕппӕт кедртӕ,

¹⁰ сырдтӕ ӕмӕ ӕппӕт фос, хилӕгойтӕ ӕмӕ базырджын мӕргътӕ,

¹¹ дунейы ӕппӕт паддзӕхтӕ, ӕппӕт адӕмтӕ, ӕппӕт барджынтӕ ӕмӕ дунейы ӕппӕт тӕрхонгӕнджытӕ,

¹² ӕрыгон лӕппутӕ ӕмӕ чындздзон чызджытӕ, зӕрӕдтӕ ӕмӕ кӕстӕртӕ.

¹³ Иууылдӕр стауӕнт Дунедарӕджы ном — Дунедарӕджы номӕй ницы ис уӕлдӕр, зӕхх ӕмӕ арвӕй бӕрзонддӕр у Йӕ кад.

¹⁴ Уый Йӕ адӕмӕн радта уӕлахиз, скадджын кодта Йе ’ппӕт сыгъдӕджыты — Израилы байзӕддаджы, ӕввахс Ӕм чи у, уыцы адӕмы. Алелуйа!