Псаломтӕ 147 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Стау, Йерусалим, Дунедарӕджы! Стау, Сион, дӕ Хуыцауы!

² Уымӕн ӕмӕ дын Уый дӕ кулдуары ӕвдузӕнтӕ фидар кӕны, дӕ фырттӕн дын арфӕ кӕны!

³ Дӕ арӕнтыл дын фарн тауы, ӕвзаргӕ мӕнӕуӕй дӕ ӕфсады.

⁴ Уый зӕххӕн Йӕ уынаффӕтӕ ӕрвиты ӕмӕ Йӕ ныхас уайтагъд ӕрыхъуысы зӕхмӕ.

⁵ Урс тинтычъийау ӕрытауы мит, ӕртхутӕгау ӕрызгъалы халас.

⁶ Къӕртгай ӕркалы их, чи бафӕраздзӕн Йӕ хъызтӕн?

⁷ Уый куы фӕзӕгъы, уӕд Йӕ дзырдӕй атайы алцы, дымгӕ рауадзы, ӕмӕ азгъорынц дӕттӕ.

⁸ Уый Йӕ ныхас загъта Йаковӕн, Йӕ фӕтк ӕмӕ уагӕвӕрдтӕ — Израилӕн.

⁹ Ӕндӕр адӕмтӕн ахӕмӕй ницы бакодта, нӕ Йын зонынц уыдон Йӕ уагӕвӕрдтӕ. Алелуйа!