Псаломтӕ 146 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алелуйа! Стаут Дунедарӕджы — куыд ӕхцон у нӕ Хуыцауы кадӕн зарын! Куыд адджын у, куыд ӕхсызгон у Уый стауын!

² Дунедарӕг аразы Йерусалим, ӕмбырд кӕны Израилы тард адӕмы.

³ Дунедарӕг сдзӕбӕх кӕны зӕрдӕсастыты, сӕ хъӕдгӕмттӕ сын бабӕтты.

⁴ Уый банымайы стъалытӕ, алкӕй дӕр дзы хоны йӕ номӕй.

⁵ Стыр у Дунедарӕг, ӕмӕ стыр у Йӕ хъомыс, ӕгӕрон у Йӕ зонд.

⁶ Дунедарӕг сбӕрзонд кӕны сӕрныллӕджыты, ӕнаккӕгты та зӕххы онг ӕруадзы.

⁷ Дунедарӕгӕн кады зарӕг сисут, хъисфӕндыртимӕ азарут нӕ Хуыцауӕн.

⁸ Уый арв ӕрбамбӕрзы мигътӕй, зӕххыл къӕвда ӕруадзы, хӕхтыл кӕрдӕг ӕрзайын кӕны.

⁹ Уый дӕтты хӕринаг цӕрӕгойтӕн ӕмӕ халоны ӕххормаг цъиутӕн.

¹⁰ Уый бӕхӕн йӕ хъарумӕ нӕ кӕсы, адӕймаджы цӕрдӕг къӕхтӕ ницӕмӕ дары.

¹¹ Чи Дзы тӕрсы ӕмӕ Йӕ хорзӕхмӕ ӕнхъӕлмӕ чи кӕсы, уыдоныл ауды.