Псаломтӕ 141 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды зондамонӕн псалом. Йӕ куывд, лӕгӕты куы уыдис, уӕд. Дунедарӕгмӕ фӕдисхъӕр кӕнын, Дунедарӕгмӕ кувын хъӕрӕй.

² Мӕ хъӕстытӕ фӕкодтон Йӕ разы, мӕ хъизӕмар Ын раргом кодтон.

³ Мӕ уд куы бастади мӕ мидӕг — зыдтай мын Ды мӕ фӕндаг. Цы фӕндагыл цыдтӕн, уым мын мӕ размӕ сӕвӕрдтой къӕппӕг.

⁴ Мӕ рахизфарсмӕ кӕсын ӕмӕ уынын: хъуыдыгӕнӕг мӕ нӕй, нӕй мын, кӕм балӕууон, ахӕм ран, мӕ удыл мын ничи тыхсы.

⁵ Ӕз сдзынӕзтон Дӕумӕ, Дунедарӕг, ӕмӕ загътон: «Ды дӕ ме ’мбӕхсӕн, мӕ амонды хай зӕххыл!»

⁶ Тынг ӕрлӕмӕгъ дӕн, ӕмӕ мын ме ’рдиагмӕ ӕрыхъус! Мӕ фӕдыл зилджытӕй мӕ бахиз, уымӕн ӕмӕ уыдон мӕнӕй тыхджындӕр сты.

⁷ Мӕ ахӕсты бынатӕй мӕ ракӕн, ӕмӕ ӕз стаудзынӕн Дӕ ном. Рӕстгӕнджытӕ мӕ алыварс ӕрлӕудзысты, Дӕ хорзӕхӕй мӕ куы схайджын кӕнай, уӕд.