Псаломтӕ 140 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. О Дунедарӕг, фӕдисхъӕр Дӕм кӕнын, ӕмӕ мӕм ратындз ӕххуысмӕ! Мӕ хъӕлӕс Дӕм фехъуысӕд, куы Дӕм дзыназон, уӕд!

² Мӕ куывд Дӕм схӕццӕ уӕд буды хӕрздӕфау! Мӕ къухтӕ Дӕм кӕй ныттыгътон, уый та Дын фӕуӕд изӕры нывондау!

³ О Дунедарӕг, ме ’взагӕн мын уромӕг сӕвӕр, мӕ дзыхы дуар мын бахъахъхъӕн.

⁴ Уыцы ахъаз мын бакӕн, цӕмӕй мӕ зӕрдӕ ӕнаккаг митӕм ма аздӕха, фыдгӕнджытимӕ ӕмдзӕхдон ма уон ӕмӕ семӕ иу фынгыл ма бадон!

⁵ Уадз ӕмӕ мӕ бафхӕра рӕстгӕнӕг — уымӕй мын хорзы бацӕудзӕн ӕрмӕст, раст мын цыма мӕ сӕр хӕрздӕфгӕнӕн сойӕ байсӕрста, уыйау. Ӕз та кувдзынӕн фыдгӕнджыты тыххӕй, цӕмӕй фыдмитӕ мауал кӕной.

⁶ Сӕ тӕрхоны лӕгтӕ къӕдзӕхтӕй ӕппӕрст ӕрцӕудзысты, ӕмӕ уӕд базондзысты, мӕ ныхӕстӕ раст кӕй уыдысты, уый.

⁷ Ӕмӕ зӕгъдзысты: «Раст цыма зӕхх афастӕуыд ӕмӕ йӕ ныммур чындӕуыд, уыйау згъӕлынц не стджытӕ мӕрдтыбӕсты коммӕ».

⁸ О Дунедарӕг Хуыцау, ӕрмӕстдӕр Дӕумӕ у мӕ каст, мӕ зӕрдӕ дарын Дӕуыл: ма мӕ фесаф!

⁹ Фыдгӕнджыты къӕппӕджытӕй, сӕ ахсӕн хызтӕй мӕ бахиз!

¹⁰ Уадз ӕмӕ ӕнаккӕгтӕ сӕ ахсӕн хызты бахауой сӕхӕдӕг, ӕз та сӕ иувӕрсты ацӕудзынӕн ӕдасӕй.