Псаломтӕ 139 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Давиды псалом.

² О Дунедарӕг, фыдгӕнӕгӕй мӕ фервӕзын кӕн, тыхгӕнӕгӕй мӕ бахиз!

³ Уыдон сӕ мидзӕрдӕйы фыдвӕндтӕ нывӕндынц, хӕстӕргомӕй ӕрвитынц сӕ цард.

⁴ Калмау мӕм сӕ цыргъ ӕвзаг сласынц, сӕ былтыл — калмы марг.

⁵ О Дунедарӕг, фыдгӕнджытӕй мӕ бахиз, тыхгӕнджытӕй мӕ бахъахъхъӕн: цӕмӕй фӕцудон, уымӕ бӕллынц уыдон.

⁶ Хъалтӕ мын мӕ развӕндагыл сӕвӕрдтой къӕппӕджытӕ, ахсӕн хызтӕ ӕрытыдтой.

⁷ Ӕз Дунедарӕгӕн загътон: «Ды мӕ Хуыцау дӕ, фехъус мын мӕ куывд, о Дунедарӕг!

⁸ О Бардарӕг Хуыцау, мӕ хъомысджын Ирвӕзынгӕнӕг! Тохы бон мӕ Дӕ базыры бын бакӕныс!

⁹ О Дунедарӕг, фыдгӕнӕгӕн йӕ фӕндон цы не сӕххӕст уа, йӕ фыдвӕндтӕ ӕнтыстджын цы нӕ уой, уыцы ахъаз бакӕн! Науӕд йӕ сӕр бӕрзӕндты хӕсдзӕни».

¹⁰ Чи мыл ӕртыхсти, уыдон сӕхӕдӕг сӕ фыддзыхты амӕттаг бауӕнт!

¹¹ Судзгӕ цӕхӕр сыл ӕркӕлӕд, судзгӕ сӕрсӕфӕнмӕ сӕ нывзилӕнт, уырдыгӕй куыд макуыуал схизой!

¹² Маргӕвзаг адӕймаг не ’рфидар уыдзӕн зӕххыл, фыдлӕгӕн йӕ фыдмитӕ йӕхи сӕрыл ӕрцӕудзысты ӕмӕ бабын уыдзӕн.

¹³ Ӕз зонын, Дунедарӕг раст тӕрхон рахӕсдзӕн, мӕгуыр адӕмӕн рахӕцдзӕни сӕ сӕрыл.

¹⁴ Рӕстгӕнджытӕ Дын стаудзысты Дӕ ном, рӕстӕй чи цӕры, уыдон цӕрдзысты Дӕ цӕсгомы раз.