Псаломтӕ 138 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн. Давиды псалом. Ды бафӕлвӕрдтай, Дунедарӕг, мӕн ӕмӕ мӕ зоныс.

² Ды зоныс, ӕз кӕд ӕрбадын, кӕд сыстын, Ды дардмӕ дӕр мӕ хъуыдытӕ ӕмбарыс.

³ Цӕугӕ кӕнон, мӕ фӕллад уадзон — Ды мӕ уыныс, мӕ фӕндӕгтӕ Дын иууылдӕр зындгонд сты.

⁴ Мӕ былалгъыл нӕма абады дзырд, о Дунедарӕг, афтӕ йӕ фӕзоныс.

⁵ Разӕрдыгӕй дӕр мӕ хъахъхъӕныс ӕмӕ фӕстӕрдыгӕй дӕр, Дӕ арм мыл дарыс.

⁶ Ды алцы куыд зоныс, уый мӕ ӕфтауы стыр дисы, мӕ зонд ӕй нӕ ахсы!

⁷ Кӕдӕм у мӕ бон ацӕуын Дӕ Удӕй, Дӕ цӕстӕнгасӕй бамбӕхсӕн кӕм ис?

⁸ Куы ссӕуон арвмӕ — Ды уым дӕ, мӕрдтыбӕстӕм куы ныххизон — уым дӕр Ды.

⁹ Сӕуӕхсиды базыртыл куы атӕхон ӕмӕ денджызы иннӕ кӕрон куы ӕрцӕрон,

¹⁰ уӕд мыл уым дӕр Дӕ арм дардзынӕ, Дӕ рахиз къух мӕ хъахъхъӕндзӕн.

¹¹ Куы зӕгъин ӕз: «О, бамбӕхсӕд мӕ тар, мӕ алыварс нытталынг уӕд бӕстӕ»,

¹² уӕд дӕр мӕ тар нӕ бамбӕхсид Дӕуӕй: ӕхсӕв рухс у бонау, рухсӕй уӕлдай нӕу тар.

¹³ Ды сфӕлдыстай, мӕ мидӕг цы ис, уыдон, мӕ мады гуыбыны мӕ Ды бауӕфтай.

¹⁴ Стауын Дӕ, уымӕн ӕмӕ диссаг у ме сконд! Диссаг сты Дӕ хъуыддӕгтӕ, ӕмӕ уый мӕ уд хорз ӕмбары.

¹⁵ Сусӕгӕй мӕ куы арӕзтӕуыд, гуыбыны арфы нывӕст куы цыдтӕн, уӕд ме стджытӕ Дӕуӕй ӕмбӕхст нӕ уыдысты.

¹⁶ Мӕ гуырдз мын уыдтой Дӕ цӕстытӕ; цы бонтӕ мын снысан кодтай, уыдон фыст ӕрцыдысты Дӕ чиныджы, иу дӕр дзы куынӕма уыдис, уӕд.

¹⁷ Куыд зын бамбарӕн мын сты Дӕ фӕндтӕ, стӕй куыд бирӕ сты, Хуыцау!

¹⁸ Нымайын сӕ бафӕлварин, фӕлӕ уыдон змисӕй фылдӕр сты. Куы райхъал вӕййын, уӕд дӕр — Демӕ!

¹⁹ О Хуыцау, куы ӕрцӕвис фыдгӕнӕджы! Цӕугӕут мӕ разӕй, тугдзыхтӕ!

²⁰ Уыдон мӕнг ныхӕстӕ дзурынц Дӕу тыххӕй, Де знӕгтӕ сӕ дзыхы радавынц Дӕ ном.

²¹ Дунедарӕг, ӕз куыд нӕ хъуамӕ уынон ме сӕфт, Ды ӕнӕуынон кӕмӕн дӕ, уыдонӕй! Куыд ӕлгъаг мын сты Дӕ ныхмӕ цӕуджытӕ!

²² Ме сӕфт сӕ уынын, мӕхицӕн сӕ знагыл нымайын!

²³ О Хуыцау, бафӕлвар мӕ ӕмӕ мын базон мӕ зӕрдӕ; бафӕлвар мӕ ӕмӕ мын базон мӕ хъуыдытӕ.

²⁴ Ӕркӕс, кӕд, мыййаг, сӕфты фӕндагыл цӕуын, ӕмӕ мӕ Дӕхӕдӕг сараз ӕнусон фӕндагыл.