Псаломтӕ 137 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. Стауын Дӕ ӕппӕт зӕрдӕйӕ, зарын Дӕ кадӕн зӕдты раз.

² Ӕрзоныг кӕнын Дӕ уаз Кувӕндоны раз ӕмӕ стауын Дӕ ном Дӕ хорзӕх ӕмӕ Дӕ иузӕрдионы тыххӕй. Уымӕн ӕмӕ Ды ӕппӕтӕй уӕлдӕр систай Дӕ ном ӕмӕ Дӕ ныхас.

³ Цы бон Дӕм скуывтон, уыцы бон мын дзуапп радтай, ныфс бауагътай мӕ зӕрдӕйы.

⁴ О Дунедарӕг, скадджын Дӕ кӕндзысты ӕппӕт зӕххон паддзӕхтӕ, Дӕ комӕй рацӕугӕ дзырдтӕ куы фехъусой, уӕд.

⁵ Стаудзысты уыдон Дунедарӕджы фӕндӕгтӕ, уымӕн ӕмӕ стыр у Дунедарӕджы кад.

⁶ Бӕрзонд у Дунедарӕг, сӕрныллӕджы дӕр уыны, сӕрыстыры дӕр базоны дардмӕ.

⁷ Фыдбылызты фӕндагыл куы ацӕуон, уӕд мӕ Ды бахиздзынӕ мӕлӕтӕй, мӕ фыдызнӕгты мын ӕрсабыр кӕндзынӕ, Дӕ арм мыл дардзынӕ.

⁸ Дунедарӕг мын мӕ маст райсдзӕни! Дунедарӕг! Дӕ хорзӕх мыггагмӕ у! Ма мӕ ныууадз, Дӕ къухтӕ мӕ куы сфӕлдыстой!