Псаломтӕ 136 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Вавилоны цӕугӕдӕтты был-иу бадтыстӕм ӕмӕ нӕ цӕссыг калдтам, Сион мысгӕйӕ.

² Уым донхӕристыл нӕ хъисфӕндыртӕ ӕрцауыгътам.

³ Уацары нӕ чи акодта, уыдон махӕй зарджытӕ домдтой, чи нӕ ’фхӕрдта, уыдон махӕй хъӕлдзӕгдзинад агуырдтой: «Сионы зарджытӕй нын исты азарут!»

⁴ Фӕлӕ Дунедарӕджы зарӕг мах куыд ныззарӕм кӕйдӕр зӕххыл?

⁵ О Йерусалим, ӕз дӕу куы ферох кӕнон, уӕд мӕ рахиз цонг мацыуалхъом суӕд!

⁶ Ӕз дӕу куы ферох кӕнон, Йерусалим, ме стырдӕр цин ды куынӕ уай, уӕд ме ’взаг мӕ комарынгыл баныхӕсӕд!

⁷ О Дунедарӕг! Сӕ зӕрдыл ӕрлӕууын кӕн едомӕгтӕн, Йерусалимы сӕфты бон куыд хъӕр кодтой, фехалут ӕй, фехалут ӕй, зӕххы ӕмвӕз ӕй скӕнут, зӕгъгӕ.

⁸ О Вавилоны чызг, заууатмӕ кӕнӕг! Тӕхудиаг уыдзӕн, ды махӕн цы бакодтай, уый дын дӕхицӕн чи бакӕна!

⁹ Тӕхудиаг уыдзӕн, дӕ хъӕбулты дын чи сиса ӕмӕ сӕ дуртыл чи ныппырх кӕна, уый!