Псаломтӕ 134 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алелуйа! Ӕппӕлут Дунедарӕджы номӕй, ӕппӕлут дзы, Дунедарӕджы цагъартӕ,

² Дунедарӕджы хӕдзары, нӕ Хуыцауы кӕртыты лӕггад чи кӕны, уыдон!

³ Ӕппӕлут Дунедарӕгӕй, уымӕн ӕмӕ Дунедарӕг у хӕрзгӕнӕг. Стаут ын зарӕгӕй Йӕ ном, уымӕн ӕмӕ уый тынг ӕхцон у.

⁴ Дунедарӕг Йӕхицӕн равзӕрста Йаковы, Израилы скодта Йӕ исбон.

⁵ Ӕз базыдтон: Дунедарӕг стыр у, нӕ Хуыцау у ӕппӕт хуыцӕуттӕй уӕлдӕр.

⁶ Дунедарӕджы цы бафӕнда, ӕмӕ цы нӕ бакӕндзӕн — уӕлӕрвты, зӕххыл, денджызты ӕмӕ ӕнӕбын хуыдымты!

⁷ Зӕххы кӕрӕттӕй сисы мигътӕ, къӕвдайы рӕстӕг арвӕрттывдтӕ сфӕлдисы, Йӕ ӕвӕрӕнтӕй рауадзы дымгӕ.

⁸ Уый ӕрцавта Мысыры фыццаг цӕуӕты, адӕймагӕй фосы онг.

⁹ Уый дӕ зӕххыл, Мысыр, равдыста ӕмбисонды ӕвдисӕйнӕгтӕ ӕмӕ диссӕгтӕ фараон ӕмӕ йӕ адӕмӕн.

¹⁰ Ныццагъта бирӕ адӕмты, ӕрцавта хъомысджын паддзӕхты,

¹¹ аморӕгты паддзах Сигоны ӕмӕ Башаны паддзах Огы, стӕй Ханааны паддзахӕдтӕ иууылдӕр.

¹² Сӕ зӕххытӕ та сын исбонӕн радта Йӕ адӕмӕн, Израилӕн.

¹³ О Дунедарӕг! Ӕнусон у Дӕ ном, кад Дын кӕндзысты фӕлтӕрӕй фӕлтӕрмӕ!

¹⁴ Дунедарӕг Йӕ адӕмӕн хӕсдзӕни рӕстаг тӕрхон, Йӕ лӕггадгӕнджытӕн батӕригъӕд кӕндзӕн.

¹⁵ Муртаттӕгты гуымирытӕ лӕджы къухӕй конд сты — ӕвзист кӕнӕ сыгъзӕринӕй:

¹⁶ ис сын дзыхтӕ, фӕлӕ ницы дзурынц; ис сын цӕстытӕ, фӕлӕ ницы уынынц;

¹⁷ ис сын хъустӕ, фӕлӕ ницы хъусынц, сӕ дзыхы та комытӕф дӕр нӕй.

¹⁸ Уыдоны хуызӕн суыдзысты се скӕнджытӕ, стӕй сыл йӕ зӕрдӕ чидӕриддӕр дары, уыдон дӕр.

¹⁹ Израилы адӕм! Арфӕ ракӕнут Дунедарӕгӕн! Аароны байзӕддӕгтӕ! Арфӕ ракӕнут Дунедарӕгӕн!

²⁰ Левитты байзӕддӕгтӕ! Арфӕ ракӕнут Дунедарӕгӕн! Дунедарӕгӕй чи тӕрсы, уыдон! Арфӕ ракӕнут Дунедарӕгӕн!

²¹ Арфӕгонд у Сионы Дунедарӕг, Йерусалимы цӕрӕг Хуыцау! Алелуйа!