Псаломтӕ 127 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕлвонг Кувӕндонмӕ цӕуджыты зарӕг. Тӕхудиаг сты, Дунедарӕгӕй чи тӕрсы, Йӕ фӕндӕгтыл Ын чи цӕуы, уыдон!

² Дӕ къухвӕллойӕ цы бакусай, уымӕй цӕрдзынӕ. Тӕхудиаг дӕ, ӕмӕ фӕрнӕйдзаг уыдзынӕ!

³ Дӕ бинойнаг дӕ хӕдзары мидӕг зад сӕнӕфсир бӕласау — зӕнӕгджын, дӕ фынджы алыварс дӕ фырттӕ — оливӕ бӕласы ӕвзартау.

⁴ Дунедарӕгӕй чи тӕрсы, ууыл ахӕм арфӕ ӕрцӕудзӕн!

⁵ Сионы хохы сӕрӕй дыл Дунедарӕг Йӕ арфӕ ӕруадздзӕн! Цӕрӕнбонты цин кӕндзынӕ Йерусалимы амондыл!

⁶ Дӕ цоты цоты дӕр ма ӕрӕййафдзынӕ! Израилы адӕм фӕрнджын уӕнт!