Псаломтӕ 125 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕлвонг Кувӕндонмӕ цӕуджыты зарӕг. Дунедарӕг Сионӕн йӕ уацайрӕгты ӕрбаздӕхта, уӕд нӕм уый фын фенӕгау касти.

² Нӕ цины хъӕр хъуысти, зарыдыстӕм, махмӕ кӕсгӕйӕ, адӕмтӕ дзырдтой: «Дунедарӕг сын стыр диссаг сарӕзта!»

³ О, Дунедарӕг нын сарӕзта стыр диссаг, ӕмӕ нӕ цинӕн кӕрон нал уыди!

⁴ О Дунедарӕг, нӕ адӕмы нын уацарӕй раздах, хуссары хуыскъ адӕгтӕ донӕй куыд бафсадыс, уыйау!

⁵ Йӕ хоры нӕмыг цӕссыгкалгӕйӕ чи байтыдта, уыдон цины зарджытимӕ исдзысты сӕ тыллӕг!

⁶ Йӕ тауинаг хуыммӕ кӕугӕйӕ чи хаста, уый цинӕй райгӕйӕ ӕрбаздӕхдзӕн, йӕ хоры куыристӕ хӕсгӕйӕ.