Псаломтӕ 123 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Уӕлвонг Кувӕндонмӕ цӕуджыты зарӕг. Сарӕзта йӕ Давид. Дунедарӕг немӕ куы нӕ уыдаид, — Израил йӕхӕдӕг зӕгъӕд, —

² Дунедарӕг немӕ куы нӕ уыдаид, адӕм нӕ ныхмӕ куы сыстадысты —

³ удӕгасӕй нӕ аныхъуырдтаиккой сӕ судзгӕ масты пиллонӕй.

⁴ Фӕдӕлдон уыдаиккам, дӕттӕ цыдаиккой нӕ сӕрты,

⁵ доны знӕт уылӕнты бын фӕуыдаиккам.

⁶ Арфӕгонд у Дунедарӕг, сӕ дӕндӕгты амӕттаг нӕ Чи нӕ бакодта!

⁷ Маргъ ахсӕн хызӕй куыд аирвӕзы, уыйау мах дӕр аирвӕзтыстӕм. Ахсӕн хыз аскъуыд, ӕмӕ ссӕрибар стӕм.

⁸ Ауды ныл Дунедарӕг — арв ӕмӕ зӕхх Сфӕлдисӕг.