Псаломтӕ 114 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Ӕз цин кӕнын, Дунедарӕг мын мӕ дзыназын, мӕ куывд кӕй фехъуыста, ууыл.

² Йӕ хъус мӕм ӕрдардта, ӕмӕ Йын Ӕз ардзынӕн Йӕ ном, цалынмӕ удӕгас уон, уӕдмӕ.

³ Мӕлыны къахыл ныллӕууыдтӕн, мӕрдтыбӕсты хъизӕмӕрттӕ мӕ баййӕфтой, сӕргой ӕмӕ додойаг фӕдӕн.

⁴ Уӕд ӕз Дунедарӕгмӕ сдзынӕзтон: «О Дунедарӕг, бахиз мын мӕ уд!»

⁵ Дунедарӕг фӕлмӕнзӕрдӕ ӕмӕ рӕстаг у, барон у нӕ Хуыцау.

⁶ Ӕнӕхинтыл Йӕ арм дары Дунедарӕг, ӕз бастадтӕн, ӕмӕ мӕ Уый фервӕзын кодта.

⁷ О мӕ уд, дӕхимӕ ӕрцу ӕмӕ ӕрсабыр у — Дунедарӕг дӕ схайджын кодта Йӕ хорзӕхӕй!

⁸ Ды мын мӕ уд бахызтай мӕлӕтӕй, мӕ цӕстытӕ — цӕссыгӕй, мӕ къӕхтӕ — фӕкӕлынӕй!

⁹ Ӕмӕ удӕгӕсты дунейы ӕз Дунедарӕджы раз мӕ царды бонтӕ ӕрвитдзынӕн.