Псаломтӕ 110 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алелуйа! Стауын Дӕ, Дунедарӕг, ӕппӕт зӕрдӕйӕ рӕстудты ӕмбырды ӕмӕ дзыллӕйы ’хсӕн.

² Стыр сты Дунедарӕджы хъуыддӕгтӕ, уарзон кӕмӕн сты, уыдонӕн — бӕллиццаг.

³ Йӕ хъуыддӕгтӕ — стыр ӕмӕ рӕсугъд, Йӕ рӕстад у ӕнусон.

⁴ Йӕ диссӕгтӕн ферохгӕнӕн нӕй, фӕлмӕнзӕрдӕ ӕмӕ рӕдау у Дунедарӕг.

⁵ Чи Йӕ нымайы, уыдонӕн дӕтты хойраг, ӕнусмӕ Дзы нӕ рох кӕны Йӕ фӕдзӕхст.

⁶ Йӕ хъуыддӕгты Йӕ адӕмӕн равдыста Йӕ хъару — муртаттӕгты бӕстӕ сын сӕ хай бакодта.

⁷ Раст тӕрхон ӕмӕ ӕцӕгад — Йӕ хъуыддӕгты, Йӕ уынаффӕтӕн фехалӕн нӕй,

⁸ мыггагмӕ фидаргонд сты уыдон, сӕ бындуры — ӕцӕгад ӕмӕ рӕстад.

⁹ Уый фервӕзын кодта Йӕ адӕмы, ӕнусон фидыд сарӕзта семӕ. Уаз ӕмӕ тасӕфтауӕг — Йӕ ном!

¹⁰ Уӕлзонды райдиан — Дунедарӕгӕй тас; Йӕ фӕдзӕхстытӕ Йын чи ӕххӕст кӕны, уыдонӕн ис ӕмбаргӕ зонд. Дунедарӕджы стаудзысты ӕнустӕм!