Псаломтӕ 11 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕггӕнджыты къорды разамонӕгӕн: хъисфӕндырты цагъдимӕ; ныллӕг хъӕлӕсӕй. Давиды псалом.

² Дунедарӕг, фервӕзын мӕ кӕн, уымӕн ӕмӕ раст адӕймаг нал ис! Адӕмы ’хсӕн никӕуылуал ис ӕууӕнк.

³ Иууылдӕр сайынц кӕрӕдзи, козбау ныхас, ӕфсоны дзырд кӕнынц.

⁴ Дунедарӕг фесафдзӕн алы козбау ӕвзаджы хицауы, хиппӕлой ӕвзаг акъуырдзӕн.

⁵ Уадз ӕмӕ афтӕ ма хъуыды кӕной: «Мах дзурынмӕ дӕсны стӕм. Не ’взаг нӕ бар у — чи нын у хицау?»

⁶ «Мӕгуыртӕ удхар кӕнынц, ӕнӕбонтӕ дзыназынц, — ныр Ӕз сӕ фарс рахӕцдзынӕн, йӕ фӕдыл кӕмӕн зилынц, уый фервӕзын кӕндзынӕн», — зӕгъы Дунедарӕг.

⁷ Дунедарӕджы ныхӕстӕ сыгъдӕг сты, куынцгомы кӕй бахсыстӕуыд ӕмӕ авд хатты кӕй батайын чындӕуыд, ахӕм ӕвзистау.

⁸ Дунедарӕг, Ды нӕ хъахъхъӕндзынӕ, ацы мыггагӕй нӕ бахиздзынӕ ӕнустӕм.

⁹ Нӕ алыварс ӕнӕхуыцӕуттӕ зилынц, уымӕн ӕмӕ скадджын сты ницӕйӕгтӕ.