Псаломтӕ 109 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. Дунедарӕг загъта мӕ Бардарӕгӕн: «Сбад мӕ рахизфарс, ӕмӕ Дын Ӕз Де знӕгты Дӕ къӕхты бын ӕрӕвӕрдзынӕн».

² Дӕ хъаруйы лӕдзӕг Дӕм арвитдзӕни Дунедарӕг Сионӕй — ӕлдариуӕг кӕн Дӕ алыварс знӕгтӕн.

³ Уыцы бон Дӕ адӕм ӕмвӕндӕй тохмӕ рацӕудзысты Демӕ. Сӕуӕхсидӕй Дӕ райгуырын кодтон сӕууон ӕртӕхау.

⁴ Сомы ракодта Дунедарӕг ӕмӕ Йӕ дзырд нӕ фӕсайдзӕн: «Ды Мелхиседекы хуызӕн Алчер дӕ мыггагмӕ».

⁵ Дунедарӕг — Дӕ рахизфарс. Йӕ азары бон паддзӕхты ӕрцӕвдзӕн.

⁶ Адӕмтӕн рахӕсдзӕни тӕрхон, мӕрдтӕй байдзаг кӕндзӕни бӕстӕ, ӕгас зӕххыл хицӕутты сӕртӕ ныссӕтдзӕн.

⁷ Фӕндагыл цӕугӕдонӕй нуаздзӕн, ӕмӕ сбӕрзонд уыдзӕн Йӕ кад.