Псаломтӕ 107 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Зарӕг. Давиды псалом.

² О Хуыцау, мӕ зӕрдӕ фӕфидар ис, зардзӕни мӕ уд ӕмӕ Дӕ стаудзӕни зарӕджы зӕлтӕй!

³ Райхъал ут, дыууадӕстӕнон ӕмӕ хъисфӕндыр! Ӕз райхъал кӕндзынӕн сӕуӕхсид!

⁴ Ӕппӕт адӕмтӕн Дӕ стаудзынӕн, о Дунедарӕг, зардзынӕн Дын алы знӕмты ’хсӕн!

⁵ Арвӕй уӕлдӕр у Дӕ хорзӕх, ӕврӕгъты онг — Дӕ иузӕрдиондзинад!

⁶ Арвӕй бӕрзонддӕр уӕд Дӕ кад, Хуыцау, тӕмӕнтӕ калӕд ӕгас зӕххы сӕрмӕ!

⁷ Цӕмӕй Дӕ уарзон адӕм сӕрӕгасӕй баззайой, уый тыххӕй сӕ фервӕзын кӕн Дӕ рахиз къухы хъомысӕй! Ратт мын дзуапп!

⁸ Хуыцау загъта Йӕ рухс Кувӕндоны: «Цинӕй райдзынӕн Мӕ уӕлахизыл ӕмӕ Мӕ адӕмыл байуардзынӕн Шехемы зӕхх, абардзынӕн сын Суккоты дӕлвӕз дӕр.

⁹ Мӕн у Галаад, Менассиа дӕр — Мӕн, Ефрем у Ме згъӕрхуд, Иудей — Мӕ паддзахы лӕдзӕг,

¹⁰ Моав — Мӕ хихсӕн тас. Мӕ дзабыр аппардзынӕн Едомыл, уӕлахизы хъӕр ныккӕндзынӕн Филистимы сӕрмӕ!»

¹¹ Чи мӕ бакӕндзӕни бырухгӕд сахармӕ? Едомы ныхмӕ мӕ хӕстон балцы чи акӕндзӕн?

¹² Ды ныл, Хуыцау, куы атигъ кодтай Дӕхи! Не ’фсӕдты сӕргъы куынӕуал цӕуыс хӕстмӕ!

¹³ Ахъаз нын бакӕн, цӕмӕй не знагыл фӕуӕлахиз уӕм, уымӕн ӕмӕ адӕймагыл зӕрдӕдарӕн нӕй.

¹⁴ Хуыцауы фӕрцы фӕтых уыдзыстӕм не знӕгтыл, фӕуӕлахиз сыл уыдзӕн Уый.