Псаломтӕ 105 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Алелуйа! Сыстаут Дунедарӕджы, уымӕн ӕмӕ ныл ауды, Йӕ хорзӕх мыггагмӕ у.

² Кӕй бон бауыдзӕни Дунедарӕджы хъомыс дзыхы ныхасӕй равдисын? Чи ракӕндзӕни Йе ’ппӕт кады кой?

³ Тӕхудиаг у, Хуыцауы амындтытӕ сӕйраг кӕмӕн сты ӕмӕ ӕдзух рӕстӕй чи цӕры, уый!

⁴ О Дунедарӕг, Дӕ адӕмӕн хӕрзаудӕн куы кӕнай, уӕд-иу мӕн дӕр ӕрымыс! Исты бӕллӕхӕй сӕ куы хизай — мӕн дӕр-иу ма ферох кӕн,

⁵ цӕмӕй уынон де ’взӕрстыты фӕрныг цард, Дӕ адӕмимӕ цин кӕнон ӕмӕ Дын кад кӕнон семӕ — Дӕ исбонимӕ.

⁶ Нӕ фыдӕлтау мах дӕр фӕтӕригъӕдджын стӕм, фӕцалх стӕм ӕнаккаг митӕ, фыдракӕндтӕ аразыныл.

⁷ Хуыцау Мысыры нӕ фыдӕлтӕн цы диссӕгтӕ равдыста, уыдон сӕ ницӕуыл сахуыр кодтой, цы бирӕ хӕрзты сын бацыди, уыдон сӕ ферох сты, ӕмӕ Сырх денджызы былгӕрон сыстадысты Йӕ ныхмӕ.

⁸ Фӕлӕ сӕ Хуыцау уӕддӕр фервӕзын кодта Йӕ номы сӕраппонд, цӕмӕй Йӕ хъомыс равдиса.

⁹ Сырх денджызӕн бардзырд радта, ӕмӕ уый байсысти, раст цыма адӕм сур зӕххыл цыдысты, уыйау сӕ хуыдымы ’хсӕнты ракодта.

¹⁰ Се знӕгты къухтӕй сӕ фервӕзын кодта, фыдгулты къухтӕй сӕ бахызта.

¹¹ Се знӕгтӕ фӕдӕлдон сты, иу дӕр дзы нӕ аирвӕзт.

¹² Уӕд Ын адӕм баууӕндыдысты Йӕ ныхӕстыл ӕмӕ Йын кады зарӕг систой.

¹³ Фӕлӕ та сӕ рӕхджы ферох сты Йӕ хъуыддӕгтӕ, Йӕ уынаффӕйы сӕххӕстмӕ Йын нал банхъӕлмӕ кастысты.

¹⁴ Ӕдзӕрӕг быдыры сӕ монцты уацары бахаудысты, ӕдзӕрӕг ран Хуыцауы фӕлвӕрдтой,

¹⁵ ӕмӕ сын Уый сӕххӕст кодта сӕ курдиат, фӕлӕ сыл рын бафтыдта.

¹⁶ Рӕсӕнуаты адӕм хӕлӕг кӕнын байдыдтой Моисеймӕ ӕмӕ Дунедарӕджы уаз лӕггадгӕнӕг Ааронмӕ.

¹⁷ Уӕд зӕхх фӕйнӕрдӕм фӕцыди, ӕмӕ зӕххы скъуыды аирвӕзтысты Датан ӕмӕ Авирам йӕ балимӕ.

¹⁸ Цӕлхӕмбырдӕй куыд уыдысты, афтӕ сыл арт сирвӕзти, ӕмӕ ӕнаккӕгтӕ арты амӕттаг баисты.

¹⁹ Хоревы хохы бын уыдон уӕныджы згъӕрсурӕт джиппы рауагътой ӕмӕ йӕм бакуывтой.

²⁰ Сӕ Хуыцауы — сӕ Кад — баивтой, кӕрдӕг чи хӕры, уыцы галы халдихыл.

²¹ Ферох кодтой Хуыцауы, сӕ Ирвӕзынгӕнӕджы, Мысыры сын стыр хъуыддӕгтӕ Чи равдыста,

²² Хамы байзӕддаджы зӕххыл — диссӕгтӕ, Сырх денджызы цур — тасӕфтауӕг хабӕрттӕ.

²³ Ӕмӕ Хуыцау загъта: «Фесафдзынӕн сӕ!» Фӕлӕ Йе ’взӕрст адӕймаг Моисей къӕдзӕхы скъуыды ’рлӕууыди Йӕ размӕ, цӕмӕй Йын аздаха Йӕ маст, цӕмӕй сӕ Уый ма бабын кӕна.

²⁴ Адӕм сӕ къух ауыгътой бӕллиццаг зӕххыл, нӕ баууӕндыдысты Хуыцауы ныхасыл.

²⁵ Сӕ цатырты хъуыр-хъуыр кодтой, Хуыцаумӕ нал хъуыстой.

²⁶ Ӕмӕ сӕм уӕд Уый дӕр Йӕ къух систа, цӕмӕй сӕ ӕдзӕрӕг быдыры бабын кӕна,

²⁷ цӕмӕй сӕ байзӕддагӕн сӕ хал, сӕ бӕндӕн фӕхауа, алы адӕмтӕ, алы бӕстӕтыл ныххӕлиу уой.

²⁸ Уыдон райдыдтой кувын Пеоры хохы мӕнгхуыцау Баалӕн, мӕрдтӕн хаст нывӕндты фыд хордтой.

²⁹ Хуыцауы мӕсты кодтой сӕ митӕй, ӕмӕ сыл рын сыстади.

³⁰ Уӕд сын Пинхас тӕрхон кӕнын райдыдта, ӕмӕ сӕ рын ныууагъта.

³¹ Уый тыххӕй Пинхас рӕстгӕнӕгыл нымад ӕрцыди фӕлтӕрӕй фӕлтӕрмӕ, ӕнусмӕ.

³² Фӕлӕ та адӕм Меривайы доны цур Хуыцауы зӕрдӕхудты бацыдысты, уыдоны тыххӕй Моисей ӕфхӕрд баййӕфта:

³³ афтӕ сӕм смӕсты ис, ӕмӕ тӕригъӕды бацыди йе ’взагӕй.

³⁴ Дунедарӕджы дзырдмӕ нӕ байхъуыстой Йӕ адӕм — кӕмӕй сын загъта, уыцы адӕмты нӕ ныццагътой,

³⁵ фӕлӕ схӕццӕ сты семӕ, суанг ма сын се ’гъдӕуттыл дӕр сахуыр сты.

³⁶ Сӕ гуымирытӕн сын лӕггад кӕнын райдыдтой, ӕмӕ афтӕмӕй цъысымы бахаудтой.

³⁷ Дӕлимонтӕн нывондӕн хастой сӕ лӕппутӕ ӕмӕ сӕ чызджыты;

³⁸ ныккалдтой-иу ӕнаххос туг — сӕ лӕппутӕ ӕмӕ сӕ чызджыты туг. Нывондӕн сӕ хастой Ханааны мӕнгхуыцӕуттӕн, ӕмӕ зӕхх фӕчъизи кодтой тугӕй.

³⁹ Се ’наккаг митӕй фегад кодтой сӕхи, сӕ хъуыддӕгтӕ иууылдӕр — хъахбай митӕ.

⁴⁰ Ӕмӕ Дунедарӕг смӕсты ис Йӕ адӕммӕ, ӕлгъ кӕнын райдыдта Йӕ исбоныл.

⁴¹ Ӕмӕ сӕ радта ӕцӕгӕлон адӕмты къухтӕм, фыдгултӕ сын хицӕуттӕ систы.

⁴² Се знӕгтӕ сӕ ссӕстой, цагъартӕ сӕ фестын кодтой.

⁴³ Дунедарӕг сӕ цал хатты бахызта фыдбылызӕй! Фӕлӕ Йӕ уыдон мӕсты кодтой сӕ хиваст митӕй, сӕ тӕригъӕдты аххосӕй ӕгады бынатмӕ ’рхаудысты.

⁴⁴ Фӕлӕ та-иу сын сӕ хъизӕмармӕ куы ’ркасти, се ’рдиаг-иу Йӕ хъустыл куы ауад,

⁴⁵ уӕд та-иу Йӕ зӕрдыл ӕрӕфтыди, кӕддӕр семӕ цы фидыд сарӕзта, уый ӕмӕ, бирӕбараг кӕй у, уый фӕрцы та-иу сын фӕтӕригъӕд кодта.

⁴⁶ Уацары-иу кӕмӕ бахаудтой, уыдоны зӕрдӕ-иу сӕм фӕфӕлмӕн кодта.

⁴⁷ О Дунедарӕг, нӕ Хуыцау, фервӕзын нӕ кӕн! Ӕрӕмбырд нӕ кӕн адӕмты ’хсӕнӕй, цӕмӕй та Дын кад кӕнӕм Дӕ уаз номӕн, Дӕ кадӕй Дын ӕппӕлӕм!

⁴⁸ Кад уӕд Дунедарӕгӕн, Израилы Хуыцауӕн, мыггагӕй-мыггагмӕ! Дзыллӕ иууылдӕр зӕгъӕнт: «Аммен! Алелуйа!»