Псаломтӕ 102 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. Арфӕ кӕн, мӕ уд, Дунедарӕгӕн, арфӕ кӕн, мӕ зӕрдӕ, Йӕ уаз номӕн!

² Арфӕ кӕн, мӕ уд, Дунедарӕгӕн, ма Йын рох кӕн Йӕ бирӕ хорзӕхтӕ:

³ Уый дын хатыр кӕны де ’ппӕт азымтӕ, дзӕбӕх дын кӕны де ’ппӕт низтӕ.

⁴ Ирвӕзын дӕ кӕны ингӕнӕй, кады худау дӕуӕн — Йӕ хорзӕх ӕмӕ Йӕ бирӕ хӕрзтӕ.

⁵ Йӕ лӕвӕрттӕй дӕ ӕфсады, ӕмӕ цӕргӕсау раздӕхы де ’взонгад.

⁶ Рӕстаг сты Дунедарӕджы хъуыддӕгтӕ, — ӕфхӕрды сӕрыл раст тӕрхон рахӕссы.

⁷ Уый Моисейӕн раргом кодта Йӕ фӕндӕгтӕ, Израилы байзӕддӕгтӕн — Йӕ хъуыддӕгтӕ.

⁸ Дунедарӕг рӕдау ӕмӕ хатыргӕнаг у, бирӕ быхсы, ӕгӕрон у Йӕ хорзӕх.

⁹ Йӕ маст нӕ судздзӕни мыггагмӕ, ӕнустӕм маст Йӕ зӕрдӕйы нӕ хӕссы.

¹⁰ Нӕ тӕригъӕдтӕм гӕсгӕ нын нӕ фӕвӕййы, нӕ азымтӕм гӕсгӕ нын нӕ бафиды.

¹¹ Арв зӕххӕй цас бӕрзонддӕр у, уыйас ӕгӕрон у Йӕ хорзӕх, Хуыцауы тас кӕмӕ ис, уыдонмӕ.

¹² Скӕсӕн ныгуылӕнӕй цас дард у, уыйас махӕй адард кодта нӕ фыдракӕндтӕ.

¹³ Фыд йӕ хъӕбултыл куыд ауды, афтӕ ауды Дунедарӕг, Хуыцауы тас кӕмӕ ис, уыдоныл.

¹⁴ Уымӕн ӕмӕ нын зоны не сконд, сыджыт кӕй стӕм, уый Дзы нӕ рох кӕны.

¹⁵ Адӕймаджы цард у кӕрдӕджы фӕзындау, быдираг дидинӕгау бирӕ нӕ ахӕссы.

¹⁶ Радымы йыл дымгӕ, ӕмӕ цыдӕр ӕрбавӕййы, ӕмӕ, кӕм уыд, уыцы бынат дӕр ничиуал ӕрымысдзӕн.

¹⁷ Хуыцауы тас кӕмӕ ис, уыдон та Дунедарӕджы хорзӕхӕй хайджын уыдзысты мыггагмӕ.

¹⁸ Хуыцауы фидыд кӕй зӕрдыл лӕууы, Йӕ фӕдзӕхстытӕ Йын чи нӕ рох кӕны ӕмӕ сӕ чи ӕххӕст кӕны, уыдонӕн сӕ байзӕддаг хайджын уыдзысты Йӕ хорзӕхӕй.

¹⁹ Дунедарӕг Йӕ паддзахы бадӕн ӕрӕвӕрдта уӕлӕрвты ӕмӕ паддзахиуӕг кӕны дун-дунейы.

²⁰ Арфӕ кӕнут Дунедарӕгӕн, Йӕ хъомысджын зӕдтӕ, Йӕ дзырд ӕххӕстгӕнджытӕ, Йӕ ныхасмӕ хъусджытӕ.

²¹ Арфӕ кӕнут Дунедарӕгӕн, Йе ’ппӕт уӕларвон ӕфсӕдтӕ, Йӕ фӕндон ӕххӕстгӕнӕг лӕггадгӕнджытӕ.

²² Арфӕ кӕнут Дунедарӕгӕн Йе ’ппӕт фӕлдисӕндтӕ — Йӕ паддзахады кӕмдӕриддӕр. Арфӕ ракӕн, мӕ уд, Хуыцауӕн.