Псаломтӕ 100 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Давиды псалом. Иузӕрдиондзинад ӕмӕ раст тӕрхон стауын мӕ зарӕджы, Дӕуӕн зарын, Дунедарӕг!

² Раст фӕндагыл у мӕ сагъӕс ӕдзух, кӕд мӕм ӕрцӕудзынӕ? Сыгъдӕгзӕрдӕйӕ ӕз цӕрын мӕ хӕдзары,

³ ӕлгъаг цы у, ахӕмӕй ницы сӕвӕрдзынӕн мӕ цӕстыты раз. Хуыцауыл йӕ зӕрдӕ сивӕг ӕнӕуынон у мӕнӕн, ӕмгӕрон ӕм не ’рцӕудзынӕн.

⁴ Мӕнгардӕй мӕм ницы ис, фыддзинадӕй мӕхи хизын.

⁵ Фӕсвӕд искӕуыл цъыф чи калы, уыдоны дзыхтӕ сӕхгӕнын, сӕрхызт ӕмӕ ӕнӕввӕрсонӕн нӕ барын.

⁶ Мӕ цӕстӕнгас сарӕзтон бӕстӕйы иузӕрдионтӕм, мӕхимӕ сӕ ӕрбахӕстӕг кӕнын. Раст фӕндагыл чи цӕуы, уый мын лӕггад кӕндзӕни.

⁷ Мӕнгардӕн мӕ хӕдзары бынат нӕй, мӕнг дзурӕгӕн мӕ цӕсты раз бынат нӕ разындзӕн.

⁸ Ӕрвылрайсом ӕнаккӕгты цӕгъдын зӕххыл, Дунедарӕджы сахарӕй фесафдзынӕн фыдгӕнджыты.