Нымӕцтӕ 6 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

¹ Дунедарӕг Моисейӕн загъта:

² «Зӕгъ израилӕгтӕн: нӕлгоймаг уа ӕви сылгоймаг, назир суӕвыны тыххӕй сӕ исчи куы басомы кӕна, мӕхи Дунедарӕгӕн нывонд кӕнын, зӕгъгӕ,

³ уӕд хъуамӕ сӕн ӕмӕ махсымӕйӕ йӕхи хиза, сӕны дзмари ӕмӕ махсымӕйы дзмаримӕ хӕстӕг ма цӕуа, сӕнӕфсирӕй конд нозтытӕй макӕцы нуаза, сӕнӕфсир ӕмӕ сӕнӕфсиры хус йӕ дзыхмӕ ма хӕсса.

⁴ Йӕ назир-бонты дӕргъы йын, сӕнӕфсирӕй конд цыдӕриддӕр хӕринаг ис, аппӕй цъары онг, уыдонӕй хӕрӕн ницы ис.

⁵ Йӕ назир-бонты дӕргъы сӕрдасӕн хъуамӕ ма андзӕва йӕ сӕрыл. Цалынмӕ, Дунедарӕгӕн йӕхи цы бонты ӕмгъуыдмӕ снывонд кодта, уыдон аивгъуыйой, уӕдмӕ уаз у: хъуамӕ йӕ сӕрыхъуынтӕ рауадза.

⁶ Йӕхи Дунедарӕгӕн цы рӕстӕгмӕ снывонд кодта, уыцы бонты йын мардмӕ хӕстӕг бацӕуӕн нӕй.

⁷ Нӕй йын суанг йӕ фыд, йӕ мад, йе ’фсымӕр кӕнӕ йӕ хойы мардыл андзӕвӕн ӕмӕ уымӕй йӕхи фӕчъизи кӕнӕн дӕр: Хуыцауӕн нывондгонд кӕй у, уыцы нысан ис йӕ сӕрыл.

⁸ Йӕ назир-бонты дӕргъы Дунедарӕгӕн нывондгонд у.

⁹ Йӕ цуры ӕнӕнхъӕлӕджы исчи куы амӕла, ӕмӕ афтӕмӕй ӕнӕбары йӕ назиры сӕр куы фӕчъизи кӕна, уӕд, цы бон ссыгъдӕг ис, уыцы бон йӕ сӕрыхъуынтӕ хъуамӕ алвына — йӕ фӕчъизийы фӕстӕ сӕ ӕвдӕм бон алвынӕд.

¹⁰ Ӕстӕм бон та дыууӕ ӕхсинӕджы кӕнӕ дыууӕ бӕдул бӕлоны хъуамӕ ратта сауджынмӕ Фембӕлды Цатыры къӕсӕрыл.

¹¹ Уыцы мӕргътӕй иу сауджын ӕрхӕссӕд тӕригъӕды нывондӕн, иннӕ — иууылсудзинаг нывондӕн, ӕмӕ йӕ марды буарыл андзӕвыны тӕригъӕдӕй ссыгъдӕг кӕнӕд. Назир тӕккӕ уыцы бон йӕ сӕр срухс кӕнӕд,

¹² ногӕй басомы кӕнӕд Дунедарӕджы раз ӕмӕ фиддоны нывондӕн фыргуист ӕрбакӕнӕд. Уымӕй размӕйы назир-бонтӕ та йын сӕфт сты, уымӕн ӕмӕ йӕхи фӕчъизи кодта.

¹³ Назиры ӕгъдау ахӕм у. Йе ’мгъуыды фӕстаг бон ӕй ӕрбакӕнӕнт Фембӕлды Цатыры къӕсӕрмӕ.

¹⁴ Хъуамӕ уыцы ранмӕ Дунедарӕгӕн сӕмбӕлын кӕна: иу ӕнӕсахъат фыргуист — иууылсудзинаг нывондӕн, иу ӕнӕсахъат далыс — тӕригъӕды нывондӕн, иу ӕнӕсахъат фыр — фидыды нывондӕн;

¹⁵ чыргъӕды — сойхӕццӕ ӕвзаргӕ мӕнӕуы ссадӕй донгонд гуылтӕ, оливӕйы сойӕ сӕрст донгонд тӕнджытӕ, семӕ ма ноджы хойраджы хуын ӕмӕ сӕн.

¹⁶ Сауджын сӕ хъуамӕ равӕра Дунедарӕджы раз ӕмӕ акусарт кӕна тӕригъӕд сыгъдӕггӕнӕн нывонд ӕмӕ иууылсудзинаг нывонд,

¹⁷ фыр та фидыды нывондӕн ӕрхӕссӕд Дунедарӕгӕн донгонд гуылты чыргъӕдимӕ; сауджын-иу хойраджы хуын ӕмӕ сӕнӕй дӕр скувӕд.

¹⁸ Фембӕлды Цатыры раз алвынӕд назир йӕ сӕры хил — йӕ сомыйы нысан — ӕмӕ йӕ, фидыды нывонд цы артыл фӕсудзынц, уым баппарӕд.

¹⁹ Назир йӕ сӕры хил куы алвына, уӕд сауджын хъуамӕ сиса фыры фых базыг, иу донгонд гуыл ӕмӕ иу донгонд тӕнӕг ӕмӕ сӕ назиры ӕрмттыл ӕрӕвӕра.

²⁰ Ӕмӕ сӕ сауджын хъуамӕ хӕрдмӕ сиса Дунедарӕджы раз. Уыдон сты уаз — сауджыны хай, нывонды кӕразимаг ӕмӕ сгуыйӕн уӕлӕмхасӕн. Уый фӕстӕ назирӕн сӕн нуазыны бар ис.

²¹ Уый — сомы ракӕнӕг назиры ӕгъдау. Назир Дунедарӕгӕн нывонд хӕссы, ӕгъдау куыд домы, афтӕ ӕмӕ ма уымӕй уӕлдай — йӕ бон цы у, уый. Цы сомы ракодта, уый йын, назиры ӕгъдаумӕ гӕсгӕ, афтӕ ӕххӕстгӕнгӕ у».

²² Дунедарӕг Моисейӕн загъта:

²³ «Фехъусын кӕн Аарон ӕмӕ йӕ фырттӕн: афтӕ-иу арфӕ кӕнут израилӕгтӕн:

²⁴ „Арфӕ дын ракӕнӕд Дунедарӕг ӕмӕ дӕ бахъахъхъӕнӕд!

²⁵ Дунедарӕг дӕм рухс цӕстӕй ракӕсӕд ӕмӕ дын батӕригъӕд кӕнӕд!

²⁶ Йе ’ргом дӕм раздахӕд Дунедарӕг ӕмӕ дӕ Йӕ фарнӕй схайджын кӕнӕд!“

²⁷ Афтӕ Мын арӕнт Мӕ ном израилӕгты сӕраппонд, ӕмӕ сыл Ӕз Мӕ арфӕ ӕруадздзынӕн».